2021年6月14日星期一

【頭條獨家】出道一年冇錢賺阿媽救濟細貓搵定工幫補使費

出道一年冇錢賺阿媽救濟細貓搵定工幫補使費

細貓自言最想把握每個機會All In，咩都試吓。

2018年參加ViuTV《全民造星》並打入十強的細貓（應智越），去年在韓國慶熙大學後現代音樂系畢業後，回港自組工作室正式出道。一年多時間已經推出5首歌，當中亦有份參與創作，不過細貓依然覺得作品未夠多，希望可以All In一切闖樂壇！撰文：何蔓琪攝影：梁志明場地：Premium Party

細貓目前專注擅長嘅跳唱，「上年比較似唱作人，今年想有返固定風格，最好每3、4個月就有新作品，等大家都記得細貓嘅跳唱快歌！」

疫情下出道影響比想像中大，細貓亦要屋企人幫手維持生活，「以前我喺內地做練習生有食宿資助，讀書時期亦唔需要用到屋企人嘅錢。返到香港出道，疫情一波接一波，安排好嘅工作完全Cut晒，開始要靠積蓄同家人幫手。冇諗過影響係咁大，只可以硬住頭皮上。」細貓又坦言出道後冇賺錢機會：「呢一年完全冇收入，就算有少少，都拎去做歌或者投資喺公司。上年過咗跳舞群組之後情況好咗，但我怕疫情又爆，都想搵定工幫補使費。」

主修音樂的他，最想可找到相關工作，不過前提要隱藏歌手身份。細貓入行前曾有大量打工經驗，例如便利店店員同幫手修理水電煤，連照顧特殊兒童都試過，「最理想係搵到有關音樂嘅工，不過其他兼職，寫字樓工作嗰啲我都上到手。」

作為《造星》十強，最後卻因為合約問題未能加入MIRROR，眼見兄弟相繼走紅，細貓表示冇得後悔：「做每件事都會影響往後嘅路，如果冇同內地公司簽約，我可能冇得玩《偶像練習生》，甚至《造星》𠻹！而家可以做自己想做嘅音樂，好滿足，回想起都好珍惜呢個機會。」他又指MIRROR成員中跟Jeremy（李駿傑）最熟：「大家比賽嗰陣都係Team A，性格同鐘意嘅音樂風格又相似，好想佢快啲有自己成績。」近日Jeremy自資出Solo歌《夢言》，就是與細貓共同作曲。

另外，ViuTV出身的細貓開設工作室後都有亮相TVB，問到怕唔怕俾人話食兩家茶禮？細貓直言珍惜所有曝光機會：「當然愈多機會愈好，但其實好難取捨。我冇同電視台簽約，而你永遠唔會知機會係點嚟，花姐（ViuTV監製兼MIRROR經理人）都係《勁歌金曲》PA出身ViuTV搞咗三屆《造星》，好多囝囝囡囡，感恩佢哋都仲有搵我，期待有更多合作。我只係Small Potato，唔想畀人感覺大牌，所有工作機會都歡迎，好珍惜㗎！」