前港姐張寶兒半年前成功考獲輕型貨車棍波牌，決心挑戰高難度，駕駛「愛車如命」丈夫袁偉豪架愛驅出巡。佢拍片直擊全程恐怖驚歷。見佢好叻咁上車前檢查晒係咪帶齊駕駛執照、P牌，上咗車再調校座位，仲較埋倒後鏡，好似好專業咁，不過竟然連車匙位都搵唔到，搞到要老公一句句咁教佢點開車，真係未開車先興奮。
搞咗一輪終於開到車，點知成架車chok一chok，「地震式起步」令人咋舌！正當出屋苑車閘時，成架車又倒後，真係相當驚險。搞到袁偉豪要叫老婆停低架車喺路邊上一堂好長氣嘅理論課。終於出咗街道，行唔夠一陣張寶兒就問老公個行程去邊，袁偉豪就話係回頭返屋企，仲話：「我對你無乜信心囉」，好明顯係擔心「二奶」途中有咩損傷，為免人、車傷亡都係早走早着。不過，經張寶兒苦苦哀求下，終於出咗去High Tea休息下。不過，袁偉豪都係唔放心，回程時都係自己做番司機。張寶兒話：「等候兩周，其實是等了兩年，終於考了棍波輕型貨車牌。第一次跳上了這輛defender的司機座，做一個開棍波小貨車的女漢子。」
來源 source: http://hk.on.cc
|
鍾意就快D Share啦！
|
|
|
