傳MIRROR入紙明年暑假紅館期 Jeremy藉化妝同花姐破冰
MIRROR上月在九展連開6場演唱會，一票難求，黃牛飛更炒至高達過萬元。而近日盛傳MIRROR入紙楊千嬅放出的今年紅館跨年檔期，不過原來他們已另有打算，有報道指團體計劃明年7月開一連10場紅館演唱會，下月正式入紙申請。
紅館騷未有咁快舉行，不過就可以煲住ViuTV節目《調教你MIRROR》止止癢。昨晚播出的第11集，講到12位「鏡仔」要為經理人花姐（黃慧君）設計新造型，皆因她「成日都着黑色衫，仲有件牛仔長褸」，但大改造計劃卻不能被花姐知道，於是眾人為一位與花姐外型相似、同樣名叫慧君的特約模特兒「花膠」打扮，睇吓效果如何。
其間，姜濤、江𤒹生（Anson Kong，AK）、陳卓賢（Ian）及陳瑞輝（Frankie）負責飾物及配件，姜濤挑選了一對花花耳環，Ian就對大象公仔較有興趣，指「可以攬住影相」，甚至想自己買下收藏。AK笑言花姐可戴頭箍遮住雙眼扮Laser，又抵死指她會踩斷「斗零踭」，姜濤隨即口賤附和：「你問吓對鞋得唔得？」最後，他們改選粗踭鏡面高跟鞋，姜濤又再多口笑說：「花姐鍾意踩住MIRROR。」
至於服裝部，有楊樂文（Lokman）、王智德（Alton）及邱傲然（Tiger），Alton表示花姐的風格是「闊袍大袖、靚波鞋、黑灰Tone」，更差點想幫對方揀埋內褲！最後三人選了綠色長外衣，主持梁祖堯（祖祖）笑指該顏色是「大膽翡翠祖母綠」。而呂爵安（Edan）、柳應廷（Jer）及邱士縉（Stanley）負責設計髮型，Stanley竟提議「孖辮加空氣瀏海，再加藍色眼影」！三人手忙腳亂，Jer用熱風吹向「花膠」，最終要Edan出手。祖祖直指Edan整壞「花膠」的髮型，他說：「如果呢個係真頭髮，佢已經報咗警！」又擔心他燙燶假髮，Jer又提議為花膠紮辮。
全程只得負責化妝的李駿傑（Jeremy）十分專注，被祖祖稱讚：「Jeremy化得OK，個妝貼㗎喎！一個完全唔郁手、一個畀埋晒低B建議、一個想焫融人哋個頭，得Jeremy默默耕耘。」Jeremy表示：「我哋未試過同花姐咁Close，甚至幫佢化妝。化妝係一個好親密嘅行為，希望有日可以幫花姐化妝，我未試過好認真望人塊臉。」
「花膠」以新造型亮相，Tiger解釋：「改造有三大原則，要有突破、唔可以令花姐難受、靚。」不過，原來設計造型的目的是幫Jeremy與花姐破冰，祖祖透露：「表面上係好玩，其實想Jeremy同花姐破冰。見到Jeremy幫『花膠』化妝，我覺得會成功破冰，佢嘅溫柔、細心、專注係好有愛。大家都係開心為主，得Jeremy好認真，期待之後花姐着呢個造型，再由Jeremy化妝，會唔會破冰呢？我都好期待。」
|
鍾意就快D Share啦！
|
|
|
