2021年10月15日星期五

頭條獨家丨喬寶寶獲分配早更湊喬孫孫讚林子博醒目主動介紹工作 #喬寶寶 #林子博

頭條獨家丨喬寶寶獲分配早更湊喬孫孫讚林子博醒目主動介紹工作

長居英國嘅喬寶寶湊喬孫孫為樂，仲介紹埋工作給林子博。

51歲喬寶寶今年8月30日榮升爺爺，大仔「印度豹」的太太誕下兒子Khalson(喬孫孫)，9月30日除咗為孫仔擺滿月酒外，回家仲同兩子切餅慶生。𠵱家全家人搶住去湊BB，所以要分配時段免得有爭拗。提到林子博自爆英國新工作經喬寶寶介紹，寶寶覺得離鄉別井唔容易，係要有個照應嘅。採訪：方騫平

現居於蘇格蘭格拉斯哥嘅喬寶寶正職湊孫，喬家四代同堂，日日都好歡樂，他說：「喬孫孫受全家寵愛，𠵱家我哋要分段湊B，我負責7至12點早更，幫手執頭執尾做剪草等粗重家務，亦會接力掃吓風、BB喊就哄吓佢，但睇住佢成長都樂在其中，喬孫孫由出世7磅長肉到10磅，不過仲係冇乜頭髮。」問到會否將屋契送贈孫仔？喬寶寶坦言兩公婆已將屋契平分咗畀大仔及細仔了：「將來個孫有冇承繼權由大仔話事，不過，大仔兩公婆搵錢多我好多啦，唔使令我擔心。」

子博早有移民準備

另外，秘密帶埋子女移居英國嘅林子博喺一間地產公司做Marketing，份工由寶寶介紹，寶寶覺得一個人離鄉別井要多啲照應，多啲鼓勵，覺得子博係一個醒目仔：「我都想下一代教育好啲，所以03年送咗佢哋去英國求學，𠵱家大仔學有所成，咁子博都想搵我取吓經。其實佢喺年幾前經已問咗我好多呢度生活上嘅資料，並唔係冇準備嘅。」