2021年11月10日星期三

頭條獨家丨馬國明心情靚熱爆拍外景係咁笑忙拍劇無暇結婚詩詠神回有假就得 #唐詩詠 #馬國明

頭條獨家丨馬國明心情靚熱爆拍外景係咁笑忙拍劇無暇結婚詩詠神回有假就得

傳出婚訊，心情靚爆嘅馬國明同唐詩詠拍新劇外景時係咁笑。

「安心事件」發生近3年，47歲馬國明做咗受保護嘅「馬明BB」，去年跟34歲湯洛雯公開戀情獲全城祝福，拍拖以來屢傳好事近，最近再傳馬國明已向某國際品牌訂製婚戒預備結婚。正拍攝文偉鴻監製新劇《隱形戰隊》的馬明避談婚訊，但心情好好，連印汗都係咁笑！馬明雖然封嘴唔回應，不過「好兄弟」唐詩詠唔覺意講出重點：「𠵱家最重要係假期！」馬明大笑和應：「畀個有薪假期我會諗諗！」採訪：方騫平攝影：沈健程

上周六朝早，馬國明與唐詩詠在沙田鬧市，為TVB新劇《隱形戰隊》拍攝一場槍戰重頭戲，劇情講兩人跟恐怖份子頭目黎澤恩（組合MR成員Ronny）喺馬路上駁火，當中有爆破鏡頭。以真槍上陣嘅馬國明及Ronny全程有軍火專家傍實，每次持槍前都要由專家確定安全。

肉緊賣力拍得順利

當日雖然晨咁早開工，而且天氣回暖，着住長袖外套拍動作鏡頭嘅馬國明熱到係咁流汗，睇見佢都辛苦，但馬國明精神奕奕，心情大靚，不論同工作人員交談、跟路人影相、連補妝、甚至印汗都係咁笑。埋位時就全程投入，肉緊到青筋都現埋，相當落力，因為NG唔多，拍得好順暢。馬明形容係拍劇以來，最多動作戲嘅一套作品：「拍動作戲都辛苦㗎！反而拍槍戰場口好玩得多，尤其係男仔鍾意開槍。由於係用冇彈頭嘅真槍，槍口只係會有火，喺香港拍槍戰戲都安全嘅，唔會有蠱惑的槍(女友知唔知拍真槍戲？)又唔使同佢講，佢只係知我拍動作戲。」

詩詠爆最需要假期

問到係咪好想快啲拍完《隱》劇有時間成家立室？馬明說：「梗唔係啦，我冇假放呀！因為緊接又要拍下個新劇《法言人》，大概要拍到明年3至4月呀！ (係咪公司臨時通知？)係近排接到通知嘅。」當問到是否訂製婚戒趕做明年5月新郎及與「靚湯」搬去將軍澳新居試婚等問題時，他即以埋位拍戲簡短回應：「傳聞啫！傳聞囉！有好消息我哋會講。」問唐詩詠想唔想快啲見到馬明「做老襯」？她大笑說：「我只係想佢今日快啲收工，我就可以快啲開工，其實佢都要嗱嗱聲拍完套戲先有時間(結婚)。」馬明即補充話緊接有新劇拍，唐詩詠笑住爆響口：「又唔一定要拍完套劇，都有好多方法嘅，𠵱家最重要係假期。」馬明附和自爆說：「係呀！畀個假期我會諗吓，不過𠵱家冇假期。(同公司爭取吓)咁你幫我寫出嚟，叫公司畀個假期我，但要照出糧嘅(編按:藝人只計騷或包薪)，哈哈哈哈！」