2021年11月28日星期日

胡鴻鈞開騷乘機見家長蔡思貝連捧兩場十足女主人 #胡鴻鈞 #蔡思貝

胡鴻鈞開騷乘機見家長蔡思貝連捧兩場十足女主人

蔡思貝首場帶父母睇騷，昨晚就單拖在Hubert騷肌表演前趕到。

一連兩場《胡鴻鈞2021 The Day After演唱會》昨晚圓滿結束，一連兩晚都由炎明熹（Gigi）擔任表演嘉賓、亦一連兩晚得到緋聞女友蔡思貝「到此一遊」，首場蔡思貝更是帶同父母捧場、與Hubert的父母雙方家長齊見面！

Hubert昨晚最後一場處男個唱獲不少圈中好友捧場，計有Hubert的父母、一班聲夢學員、何麗全、樂易玲、黃智雯、何依婷、鄭俊弘與何雁詩夫婦、鄭世豪和太太、黃百鳴與女兒、吳業坤、王梓軒、羅天宇、陳曉華、吳嘉禧、陳瀅和方力申等。至於蔡思貝就單拖在Hubert騷肌表演前趕到，蔡思貝頭戴cap帽在漆黑環境下低調到場，意圖避人耳目的她事敗被發現後，還愕然反問：「咁都認得？」

未知是蔡思貝坐正台下、還是Gigi手汗太多，Hubert講到明唔敢有身體接觸！當Hubert合唱期間想拖Gigi到台中央時，Hubert不拖Gigi的手、只拖其手上的咪高鋒並說：「我同你要隔住啲嘢，唔可以觸碰你任何地方。」Gigi則笑言為Hubert獻了兩個「第一次」，分別是第一次跟男歌手合唱，及第一次獲邀做演唱會嘉賓。Hubert就鬼馬指：「Gigi的第一次畀咗我！」又笑問Gigi跟Double年紀的歌手合作有何感受？Gigi表示好開心，又讚Hubert是暖男，成功令Hubert「冧笑」！

完騷受訪，Hubert笑稱對今次的破處騷好enjoy，但2場不夠喉，希望能開夠10場。笑指他的高叉露腿裙一場比一場短，開10場豈非最後唔使著？他笑言這樣又不可，會嚇親小朋友。說到蔡思貝當晚趕及在他騷肌前入場，他說：「我只知道佢首場有來。（家屬飛？）我有問過佢要唔要藝人飛，但佢話要真金白銀用行動支持。（蔡思貝帶同父母看首場，是否雙方家長見面？）千里迢迢咁隔住幾十人見面？哈哈。我知道佢父母鍾意睇演唱會，所以前一晚有來。（還是鍾意睇你？）都希望佢父母睇完演唱會鍾意我。」

說到他跟蔡思貝心連心，看到他首場落淚也跟著喊；Hubert直認首場有點失控，許多藝人朋友也表示感動落淚，令他大感窩心和貼心。提到蔡思貝尤如女主人的捧足兩晚場，他形容二人是非常要好的朋友。不過眾藝人到後台拍大合照時，Hubert跟不管男女都擁攬，但三度與蔡思貝合照，都只是輕攬，被取笑是發乎情、止乎禮。