內地歌手張杰與名主持太太謝娜人氣高企，兩公婆喺演藝圈亦係模範夫妻，點知尋日（7日）網上瘋傳二人喺上海「跳單」買豪宅，私自搵房東簽約，直接跳過當初介紹佢哋睇樓嘅中介，慳一筆巨額中介費，令負責嘅中介揭發今次違法行為，並晒出多張當時帶二人睇樓影低嘅相做「證據」。
該中介爆料指，2019年曾帶張杰、謝娜去睇一棟價值人民幣6,200萬元人民幣（下同，約7,600萬元港幣）豪宅，二人睇過2次樓後就告知唔鍾意所以唔買，未料夫妻二人其實係跳過中介，私下直接同房東簽約，佢仲表示二人搵律師威脅自己：「威脅說我如果洩漏他們的信息，是刑事犯罪，要把我送進去（監獄）。」而當時該中介就因此而逃出中國讀書，而依家佢確診新冠肺炎，佢因為「不想帶着秘密離世」，決定跳出嚟檢舉二人。
記者翻查資料，2021年11月1日上海市不動產登記簿中，該房屋嘅權利人為「重慶眉開眼笑文化傳媒有限公司」，正正就係謝娜名下企業。目前，涉事中介已準備起訴房東、買家謝娜、張杰以及謝娜母親。有內地律師指今次若證據充足，勝訴概率唔低。
謝娜及張杰今日（8日）就委託律師事務所發表聲明否認此事，聲明中稱該中介（H先生）捏造事實，「跳單」、「威脅」等虛假信息已涉嫌造謠誹謗等。律師已經提請進入司法程序流程，並對該事件、涉事人及相關社交帳號和平台保留其他法律追究的權利。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
