2022年7月9日星期六

頭條戲場丨《雷神奇俠4：愛與雷霆》基斯頓比爾好正呀 #Chris Hemsworth #雷神

頭條戲場丨《雷神奇俠4：愛與雷霆》基斯頓比爾好正呀

就咁嘅，我唔係Marvel迷，因為Taika Waititi再執導同基斯頓比爾有份做先睇，入場門檻超低，完全唔熟都唔會睇唔明，片長119分鐘，笑位幾多，仲要有啲笑係會翻笑，陰公位又有，配樂及配角最出色，特別一讚嗰兩隻激嘈又超煩嘅羊，一叫我就笑。(剛上映)撰文:廖思慧

就係呢兩隻嘢，又嘈又煩，但好搞笑，不過出鏡太少。

導演Taika Waititi執導《雷神奇俠3》時，成功「活化」雷神，膠住講慘事，一套戲就將雷神變成「Fun佬」，Fans讚好更成為指標。《雷神4》上映後，討論區最多人問，3定4?評價參差，更有人話衰過《奇異博士2》，喂，好侮辱喎。

全部愛都好輕觸式

全片最正亦演得最好係首度加盟MCU，飾演大反派屠神者戈爾（Gorr The God Butcher）嘅基斯頓比爾，為角色參考經典驚慄片《不死殭屍︰恐慄交響曲》嘅佢，自爆喺片場因為太入戲，搞到同場演員唔敢埋身！戈爾由深信到質疑信仰再被把劍詛咒，人性秒速扭曲，仲因為死咗個女而向眾神報仇，江湖從此多事，最鍾意暗影界黑白星球群揪，最後戈爾發現愛係最重要，被愛融化嘅速度快過國產雪條。