藝人羅子溢自從拍竣劇集《婚後事》即展開悠長假期，日日留家當湊仔公，負責接送囡囡小珍珠上學前班之餘，又會行「外母政策」，陪太太楊茜堯母親到街市買餸畀意見，生活過得相當充實。日前他趁中秋佳節，舉家到屋企附近的海濱公園賞月慶團圓，事後茜堯於社交網上載當天的開心照，只見小珍珠表現相當興奮，而孻仔Eden長相開始「定型」，眼大大甚有爸爸的影子。
談到「賞月大行動」，子溢笑說﹕「小朋友比較鍾意睇閃𡃁𡃁嘅嘢，又想佢哋感受吓氣氛，所以咪去囉。我原本想幫囡囡影啲相留念，不過佢今年已經識得自己走嚟走去，加上玩得攰扭眼瞓，我都冇佢辦法，其實依家周末我會諗定活動，畀佢哋放吓電。」
據悉，子溢年底前將要「復工」，初步知道將要投入一套時裝劇的拍攝工作，不過詳情待定。屆時啟動工作模式後，子溢未必再有時間當一雙子女的「貼身護駕」，難免心掛掛，亦要辛苦「茜堯媽媽」了。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
