2022年9月23日星期五

獨家丨林明禎自爆大馬住慣幾千呎豪宅狂拍廣告儲兩年錢在港買大屋 #林明禎

獨家丨林明禎自爆大馬住慣幾千呎豪宅狂拍廣告儲兩年錢在港買大屋

「大馬女神」林明禎近年憑靚樣好身材，已接拍近10個不同類型廣告，被捧「廣告女王」的明禎，最近再有吸金機會，首度幫食肆拍廣告，食住小籠包和拉麵大賣甜笑。一直想在香港買樓的她，雖然口密唔公開吸金能力，但承認目標要買大屋，更唔覺意自爆在大馬家鄉住慣幾千呎豪宅。採訪：杜杜攝影：朱偉彥場地：翡翠拉麵小籠包

着住貼身紫色連身裙大晒fit爆身材的明禎，齋甜笑已經好吸引。



明禎扮同朋友聚會，睇佢演得幾投入。

明禎話本身同屋企人都是小籠包粉絲，平日在家鄉已經常食，今次拍廣告更加可以放縱任食，而出名鍾意食咖喱魚蛋的她，更向師傅建議新口味的小籠包，「頭先我同師傅講，佢整嘅小籠包好味又好靚，所以建議佢放啲咖喱魚蛋，或者咖喱魚蛋嘅汁落去試吓，嗰種味叫明禎小籠包，我諗一定會好多人食囉！」追問她當時還大膽話如果師傅肯整，可以免費幫手宣傳，佢即尷尬笑話：「如果佢真係整個明禎小籠包嘅話，我會考慮嘅，90%冇問題。」



明禎是小籠包迷，睇佢揸筷子可以夾唔穿就知食慣。



為食的明禎，見到碗麵竟然忍唔住偷食。

未夠膽唱廣東歌

一直恨在香港置業的明禎，拍埋呢個廣告應該距離香港「上車」又近一步，「我沒有算錢，還不敢算，今年結束才好好計算一下，我夢想買好大間屋，但𠵱家仲未會買住，因為自己仲有好多時間可以賺錢，想再畀自己多兩年時間賺錢，睇吓我嘅業績去到邊度。」不過明禎承認因為馬來西亞住幾千呎豪宅，所以要買就買大屋，「我想前面睇到海，背後有山，我媽媽應會好鍾意，因為馬來西亞地方好大，我哋屋企都好大間，所以我嘅屋企人都習慣咗。」



明禎話大馬屋企大，真係唔係講笑，在花園做瑜伽零阻礙。



呢個角度再睇，明禎大馬屋企花園瞓咁多人仲有好多空間。



明禎一家在大廳同細佬慶祝生日，睇到有埋車房泊車。

早前明禎離開香港到台灣，原來是為了明年初推出的首支單曲做準備，「我希望有一個自己嘅作品可以同大家見面，𠵱家都努力緊做一首歌。」廣東話愈來愈好的她，有冇機會推出廣東話？她即好無奈咁話，「面對面嘅時候大家都話『你嘅廣東話好好，聽得明』，但背後都會話佢講緊乜呀？哈哈！所以我唔知道我嘅廣東話到底係點樣，但如果唱歌嘅話，廣東話真係唔係講笑，一定要好正，所以𠵱家都唔係好有信心，因為我唔要唱好笑嘅歌，我要認真嘅歌。」