2022年9月28日星期三

獨家丨陳敏之碌IG睇朋友BB相都被Stop 囝囝超級呷醋唔敢追第二胎 #陳敏之

獨家丨陳敏之碌IG睇朋友BB相都被Stop 囝囝超級呷醋唔敢追第二胎

43歲陳敏之在新劇《黯夜守護者》中，飾演只差16年的江嘉敏媽咪「Da姐」，不過她接角色時完全冇掙扎。而有傳該劇是她在TVB最後一劇，她就澄清只是出晒存貨，加上暫時想專心湊仔，以及搞投資7位數的美容生意，她又自爆本身有意追多個小朋友，但囝囝妒忌心超勁，嚇到她唔敢生。採訪：杜杜攝影：Stanley

43歲敏之同27歲江嘉敏跟劇中扮演的母女一樣，相差16年。



劇中敏之一直得到陳展鵬關顧，兩人互有好感。



《黯夜》中，敏之與江嘉敏相處更似朋友。



劇中講敏之未成年時，就為李國麟生了個女。

敏之暫時放低熱愛的演員工作，因為覺得現在囝囝子樂快將6歲是最需要陪伴的年紀，回想自己小時候父母都忙，少有親子時間好可惜，「我內心深處係冇乜家庭溫暖，我睇到自己咁，我𠵱家有能力做到，就要放棄一啲好長時間嘅工作，拍劇其實我好鍾意，睇返《黯夜守護者》仲好有戲癮，做演員好好玩，但一諗到幾個月返唔到屋企瞓，因為子樂太需要我，或者等佢再大啲先再拍返嘢。」



43歲的敏之身材依然好fit，最近為忙搞生意仲瘦多5磅。

獨資搞美容生意

錫子樂錫到燶的敏之，本來有意再追多個小朋友，但被囝囝的激烈反應嚇窒，「其中一個我唔想生嘅原因係佢好妒忌，佢上年見到我有啲朋友大咗肚，就問『媽咪點解佢會有個BB喺個肚入面，你唔好話畀我聽你會有BB，我唔要呀！我打佢㗎！我唔畀佢玩玩具！』，搞到我唔敢，我真係驚！佢嚴重到連我有時喺電話睇ig，望吓朋友啲BB，佢即刻話『熄咗佢，No！』佢都幾影響我，我驚生咗出嚟會好勞氣，佢又唔愛佢，但我老公話佢生咗出嚟一定好錫，同埋我𠵱家生得出佢都大」