周慧敏指羅文親和力十足，而且相當照顧後輩：「最犀利係佢嘅親和力，見佢唔介意大家叫佢做『羅記』，就知道佢有幾親和力，不過我依然唔敢咁樣叫佢，平時見到佢都係叫Roman。佢以前見我就會囉唆我，見我每次都用好淺色嘅唇膏，仲係比較蒼白款式，佢就會話咁唔好睇，叫我搽紅啲顏色。我想話我係有聽話，而家每次做表演嘅時候，成日會用鮮色嘅唇膏，令到自己神彩飛揚啲，當每次拎住支紅色唇膏就會諗起佢。」
回憶95年與羅文為慈善合唱粵劇《劍合釵圓》，令她見識到對方一絲不苟嘅工作態度：「Roman係好有氣場，但佢好平易近人，同後輩可以玩得同融洽，所以喺佢面前你唔會驚、唔會緊張。我非常之有幸喺95年同佢有一次合作，演出粵劇折子戲，就係《紫釵記》嘅《劍合釵圓》，我早知佢係一個完美主義者，佢嗰part一定會做得最好，將最好一面呈現出嚟；但佢唔單止係咁，仲好關注對手，連我嘅造型、件衫唔夠靚、古裝頭點set，甚至化妝、做手都照顧……當導演開始拍，我哋就好快入戲，嗰次真係好enjoy，因為好快就完成拍攝，真係想拍多幾take多啲時間一齊。加上導演又拍得好唯美，拍出一個好特別感覺嘅粵劇畫面，亦係自己好鍾意嘅演出，而最感動係能夠有佢陪住去完成呢件事，覺得非常幸福。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
