2022年11月16日星期三

獨家丨梁祖堯難忘同鏡仔拍拳賽戲拍到喊「鏡粉」懇求拍《調教你MIRROR 2》 #MIRROR

獨家丨梁祖堯難忘同鏡仔拍拳賽戲拍到喊「鏡粉」懇求拍《調教你MIRROR 2》

46歲梁祖堯(祖祖)處男下海拍攝ViuTV新劇《繩角》，接拍全因角色正、拍攝場地近屋企，同埋可以同MIRROR好兄弟楊樂文(Lokman)、江𤒹生(AK)、王智德(Alton)及邱傲然(Tiger)合作。祖祖激讚鏡仔表演專業，不少拳賽場口打到口水汗水齊飛，更試過拍到喊。對於已復工的MIRROR，亦師亦友的祖祖鼓勵他們要振作：「點都會畀人話，我諗由得佢(嚴重事故)共存，總有一日會好嘅。」採訪：方騫平

首次正式拍劇的梁祖堯好驚青，最怕跟唔上節奏阻人收工。



祖祖形容拍《繩角》戲裏戲外都好熱血。



接拍新劇《繩角》全因角色正、拍攝場地近屋企，同埋可以同MIRROR好兄弟合作。



首次正式拍劇的梁祖堯坦言拍《繩角》是一次開心的體驗。



戲中AK都「食」過祖祖拳。

首次正式拍劇的梁祖堯坦言拍《繩角》是一次開心的體驗，劇中他飾演Cool爆的拳館教練，因為念舊，永遠著住舊拍擋送嘅風褸，又唔使化妝、整頭髮，開工又近屋企；唯一最唔慣經常要等，又驚跟唔上節奏阻人收工，好彩有好友同場，會拉住AK講戲，大家都熟唔使怕影響對方休息。



梁祖堯演一位Cool爆嘅拳館教練，係喜劇演員最想挑戰嘅範疇。



祖祖大讚一班飾演拳手嘅演員唔錫身，落力演出。



祖祖跟AK喺劇中有大量感動位，賺人熱淚。

鏡仔通宵拍拳賽凍到震

祖祖形容戲裏戲外都好熱血：「戲內我做陪打員，會揸拳靶，訓練時要打佢哋，為求逼真，AK都『食』過我拳，而佢哋拍拳賽時就互『食』，見住佢哋一搥搥打落去，連口水、頭髮汗水都飛埋出嚟，佢哋好唔錫身相當專業，效果好好睇。」祖祖不忘大讚鏡仔，用100%力度做好件事，所以成功有原因。而他最難忘有幾晚通宵喺觀塘碼頭，冒雨拍生死決鬥式拳賽戲，「因為佢哋減肥減到好少體脂，拍攝期間凍到震，加埋傷感情節，睇playback時大家都感動到流晒淚，我好榮幸人生第一套參與咁嘅劇。」祖祖坦言拍出戲癮，有意將執導嘅舞台劇《通菜街喪屍戰》、《隔離童話集》改編成電視劇，最好由原班人馬趙祥誠（Ben）、趙學而及陳凱詠等演出。



拍攝通宵拳賽戲晚上，赤祼上身嘅鏡仔凍到震。



大家都百份百投入演好套戲。



祖祖有意將舞台劇作《隔離童話集》改編拍成電視劇。

提到休團兩個月的MIRROR已復工，祖祖坦言12子在事故中的感受，外人永遠唔會明白，所以寄語他們只要團結必會過到，「難過總會過，正如我喺船上望向企喺碼頭嘅人，見個人愈嚟愈細，但唔等於愈嚟愈唔重要，嗰個人只係變成一粒一點，好似種子咁放喺個心陪住你，係時間拉遠咗距離，唔代表淡咗，我希望佢哋可以振作面對之後嘅路。」



MIRROR 11子於巨星籃球賽後接受傳媒訪問時，教主一度淚眼有淚光。



MIRROR第4場紅館Show發生嚴重事故，休團兩個月後已復工。



當晚梁祖堯對MIRROR紅館事故表現震驚，更發文集氣祈禱。

不便回應事故調查報告

意外帶出後遺症，祖祖明白MIRROR調整心態唔容易：「究竟佢哋用乜心態去面對工作呢？係咪出嚟帶住傷痛呢？定將傷悲放埋一邊，可以嘻嘻哈哈出嚟呢？我諗由得佢一齊共存囉，點都會畀人話，總會有一日會好嘅。」祖祖最近收到好多鏡粉DM，要求再做《調教你MIRROR 2》，不過他自言唔係心理醫生，唔太適合去做：「或者咁講，佢哋需要我，我點都會喺度！」問到可會擔心意外事件影響鏡仔發展？祖祖就話擔心唔嚟，因為冇得預測，唯一成件事需要好好交代，避免事故再發生，就連舞台劇界都震驚。對於事故報告出爐，祖祖就冇具體回應，只說：「已進入司法程序，任何人唔了解細節都唔應該回應，但情感上我會關心每位傷者，特別係最嚴重嘅阿Mo，希望佢身邊家人、朋友、女友都可以堅強起嚟，面對難過嘅時刻。」