身為女兒的Jessica雖然未有習武，但卻膽色過人，從小已跟媽媽到現場睇表演，問可擔心媽媽安全？楊盼盼搶答笑說：「佢push我去做飛越10層樓，話飛呀飛呀，哈哈哈。」Jessica表示好放心，解釋：「細個放學冇嘢做就會跟埋去，好放心，因為佢每次去做高難度表演，其實幕後都有專業團隊，仲有張存師傅去設計，佢係一位好資深做特技嘅人，有佢喺度我哋全部人都好安心，因為我哋上咗契，就好似一家人咁！」楊盼盼指張存是她的大教練，多年來並肩挑戰很多經典。
唯獨一次，令Jessica最為難忘，2018年9月，楊盼盼在馬來西亞拍攝電影《大地回春》遇片場失火，整個人瞬間變成火球，面、手和腳多處被燒傷。Jessica當時也在現場，直言第一次真正目擊意外發生，但不敢流一滴眼淚，怕影響現場的救緩工作。盼盼打趣笑女兒：「佢係遲鈍，哈哈哈。我起番身時手腳都燒着晒，面都有，全部燶晒。」盼盼隨即展現手上3吋疤痕，幸臉部已完全康復，「因為我冇濫藥，基本上只食消炎藥，雖然真係好痛，但呢個係我強項，藥我都唔使護士搽，自己嚟。」
幕前以外，楊盼盼更積極培育新人，著重「育苗、培訓、平台」三大發展。她在2004年創立「煇煌娛樂」擔任公司CEO製作電影，2020年再成立HitHut電影動作訓練創作室，培養武打人才，並於佛山設置動作特技培訓基地，「我投資7 位數，做咗20年，培訓真係用個心攞出嚟做，講就容易，做真係好難。因為唔係培訓一個學生咁簡單，仲要培訓個導師令佢有經驗，初頭我只係識動作，現在要全方位，由服裝、道具、攝影師、劇本都要做埋。」年前她主持Hoy電視《盼你賞面》訪問十位嘉賓，讓她有更多啟示，「我將培訓基地重整一下，加咗好多平台，做多啲工作崗位畀下一代，培訓完知佢哋識合咩嘢，希望喺電影行業耐啲，做得幕前又做到幕後，電影係我最高目標！」
不過，楊盼盼沒有勉強女兒要傳承，反而支持Jessica大學讀graphic design，「冇擔心過讀藝術搵唔到錢，我同佢講想讀書就盡量讀，唔鍾意都要識睇說明書，呢個係我最低要求。我家族都有位出名畫家（姑丈公是中國名畫家張大千），我都覺得阿女都有啲天份。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
