2023年2月2日星期四

獨家丨林鈺洧面對負評有妙計半日開心返晒梁超怡邢慧敏望兔年乜都試狂接Job #林俊賢 #林鈺洧 #梁超怡 #邢慧敏

獨家丨林鈺洧面對負評有妙計半日開心返晒梁超怡邢慧敏望兔年乜都試狂接Job

應屆港姐冠軍林鈺洧(Denice)、季軍梁超怡與「友誼小姐」邢慧敏在任4個月仍處於適應期，尤其「新聞女王」Denice，不論家事及言行都成為話題。踏入新一年，她努力學習調節心態，提升EQ，遇到唔開心事都唔好Sad太耐；邢慧敏自爆經常用負面新聞寸Denice，從而互相支持及鼓勵；梁超怡則以師姐郭柏妍為榜樣。採訪：方騫平攝影：羅安強

邢慧敏(左起)、林鈺洧、梁超怡希望事業能一鳴驚人。



訪問期間，邢慧敏搭住Denice大髀，感情非常好。

林鈺洧、梁超怡與邢慧敏希望兔年多啲嘢做，拍劇及做司儀都好有興趣，邢慧敏最想同兒時偶像「三哥」苗僑偉合作，提返在台慶頒獎禮見到對方，大讚好man，而且有前輩帶住拍劇會容易入戲。



林鈺洧、梁超怡與邢慧敏希望兔年多啲嘢做。



林鈺洧新一年努力學習調節心態。



林鈺洧、梁超怡與邢慧敏對拍劇及做司儀都有興趣。



邢慧敏自爆經常用負面新聞寸Denice。



梁超怡不怕Denice的新聞搶晒fo。

俾人笑吓冇所謂

當選後周身箭的Denice有感而發，坦言冇諗到會有咁多新聞。她又解釋去年平安夜，在家中用火機及在爐頭上燒棉花糖事件：「其實冇諗到惹嚟咁大迴響，當晚有啲唔開心想食甜嘢，就咁食棉花糖冇咁好食，諗起BBQ就決定烤一烤。」Denice稱有上網search過，了解直接放爐頭烤會唔會有毒？「啲煮食節目都會喺爐頭烤一烤洋蔥，其實冇所謂啦，茶餘飯後俾人笑吓都OK嘅，可能佢哋當我係發洩對象，又唔係做壞事，分享出去想表達好食同開心，新一年最緊要開心，做人簡單啲，想食棉花糖就食，以後會繼續咁食。」



Denice平安夜上載烤棉花糖短片，她先用火機燒。



之後放到爐頭上直接烤，第一粒烤焦了不成功。



烤完第2粒放落口吃被網民鬧無腦。

圍爐取暖互安慰

當選短短幾個月，Denice努力學習調整心情：「以前睇到負面新聞會唔開心幾日，甚至一星期，𠵱家會食一包大薯片，再加罐汽水去谷返啲氣出嚟，半日時間就會開心返晒。」老友邢慧敏成日笑住「寸」爆Denice：「每次有佢嘅新聞(負面)我就會Send畀佢：『喂！你又有新聞喎。』但有時睇到自己唔好嘅評語，如被網民話我男仔樣，我都照Send畀佢睇，佢會安慰返我：『大家喜好唔同啫。』我哋同係Model出身，背景相似較friend，會互相幫助，演藝路上搵到partner互相鼓勵好重要，𠵱家佢乖咗啲喇，冇咁多新聞都ok嘅。」



去年12月5日28歲生日嘅Denice，應該愈嚟愈定性。



Denice及刑慧敏互相支持。



去年10月，Denice第一次自己搞慈善活動，相約朋友到沙灘執垃圾。



去年公司安排應屆港姐進行慈善探訪。

難忘見偶像華仔

問到Denice會否提醒父母要家和萬事興，免得影響她發展？她坦白說：「佢哋鬧完一場，發洩完都靜咗啦，可能條氣順咗，大家都係成年人應該識諗，我完全冇干預，免得怪我幫埋一邊。」隨著疫情緩和，問她可會做乖乖女分開請父母去旅行，舒紓一吓雙方情緒？Denice偷笑說：「不如我送機票畀佢哋，等佢哋兩個自己去咁我開心啲，然後我就 block咗佢哋電話，唔好打嚟畀我。」另外，梁超怡最難忘於《無間道》20周年首映上見到偶像劉德華，她開心到想喊，又話以「女飛躍」郭柏妍為努力榜樣，見她入行兩年經已有好大進步。問到過去幾個月會否覺得被Denice的新聞搶晒fo？梁超怡就話唔關事：「各有各新聞。」