80年代的香港電影，曾以《殭屍先生》成功開出一門經典戲種，橫掃全球。去到90年代，荷里活的喪屍片愈來愈盛行，間接影響了香港「殭屍」的變種，加上B級製作模式，跟當年大受翻版影響，拍攝資金愈來愈少的香港電影不謀而合。在這「天時地利」下，拍出好幾部這類港式喪屍電影，其中代表作就是這套《生化壽屍》。
爛牙駒金句︰「冇嘢做就打蠟」
故事講述有富商引入喪屍病毒來港，打算用來殺敵，但意外被駱達華飲咗變成喪屍，更誤闖入某商場，令商場內所有人逐一受到感染，一時間變成「屍殺商場」。其中古惑仔無敵（陳小春 飾）和喪B（李璨琛 飾）在場內開老翻店，而黎耀祥飾演的爛牙駒，就在場內開電話舖收二手機，喪屍病毒一爆發，令大家展開一場困獸鬥。
黎耀祥在戲中出場都相當搞笑，把口唱住黎明首《100樣可能》，但就只識一句︰「Say You, Say You, Love Me 」而且出場一幕已經巴巴閉閉，大聲夾無準，一味死充，最鍾意搵老婆（黎淑賢 飾）出氣，經常用一句︰「冇嘢做就打蠟」叫老婆醒少少。不過去到結局一幕，見到老婆被喪屍圍，祥哥展現全片最Man一幕，衝出去犧牲自己勇救老婆，真係睇到眼濕濕。
陳小春激嘴湯盈盈
喪屍電影除了有驚嚇場面，少不了要有靚女性感演出元素，而在戲中負責性感擔當的，就有黎淑賢和初出道的湯盈盈。前者被喪屍廝殺一幕，無意間被扯爛衫要露Bra演出，性感非常。至於湯盈盈就更搏，全程真空上陣，不時顯得若隱若現。最激一幕要數醉後與陳小春在廁所內肉搏，雖然最終搞唔出咩嘢，但小春全程投入，鍚到嘴都歪埋，只怪入戲太深一時抽離唔到。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
