天王郭富城（城城）太太方媛上月36歲生日，上年就獲老公送99支紅玫瑰賀壽，今年仲有待全家出巡，溫馨親子樂嘅同時，身為舞王嘅城城仲親自上陣同方媛浪漫共舞，羨煞旁人！見城城晒出多張合照，冧豬留言：「親愛的老婆，生日快樂🎂、與你共舞❤️😊😍😘」見佢同方媛兩個喺巨型水族館魚缸前跳舞，愈望愈有夫妻相，大擺心心合體手勢，真係冧到震。
另一張合照見到原來唔係二人世界，兩個囡囡都一同參與媽咪嘅生日P，今次仲比之前露出更多神秘靚樣，只係遮住個高鼻，都仍然Feel到兩位千金都好有明星相，似足父母嘅優良基因。
另外，其實呢間酒店勁有來頭，有冇發覺城城同方媛，身處呢個嘅水族館睇唔到其他人吖？因為呢度佢哋間房嚟呀，房間入面有自家水族館呀！呢間其實係上海一間勁出位嘅酒店，係世界上第一間人工海拔最低嘅五星級酒店，人哋酒店就向高空發展，佢就直插入地下，齋計地下嘅層數就有16層，地下房間設計成水下客房，喺房入面就睇到勁多魚，畀美國國家地理頻道封為「世界十大建築奇蹟 」酒店，上網睇番今日個房間價錢，盛惠2萬蚊人仔，城城有幾錫老婆都唔使再講喇！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
