藝人馬國明、蔡思貝、高海寧、洪永城今日（8日）出席無綫新劇集《飛常日誌》主題曲全球大招募記招。即將與湯洛雯（靚湯）結婚的馬國明，被問會否考慮在婚禮當天上台獻唱？他說：「到時先算，真係未知。（靚湯話想你跳舞？）呢個我知，有啲驚嚇，因為我係唔識跳舞，見過我跳舞嘅人都應該知我舞技去到邊，可能係因為我哋冇玩新郎環節，所以佢可能想我跳舞出吓醜。（唱歌同跳舞邊樣驚啲？）咁梗係跳舞（到時6位兄弟係邊個？）呢個就唔透露住，不過有圈內圈外嘅人。」他表示婚禮會盡量以簡單方式進行，暫不便透露太多。
另外，馬國明亦笑指不會自薦唱主題曲：「我淨係登台收錢先唱，我從來唔理自己唱成點，我有錢賺就得，所以我好鍾意返內地唱歌，我成日聽啲歌手話台下啲觀眾都唔聽我唱歌，但我就認為佢哋唔聽仲好，我求其唱完就走。」
蔡思貝則指自己很喜歡唱歌，但並非專業，而且亦沒有豐富的舞台經驗，需要累積。二人都認為今次的主題曲全球大招募是一個很好的平台，可給年輕人或寂寂無聞的音樂人發揮自己才能。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
