資深藝人李影於加拿大過身，有幕後人證實消息。昔日跟李影拍拖的藝人劉松仁接受東網電話訪問時，對於李影過身，他表示不知情：「我哋一直有聯絡，但冇聽過佢有咩病。」他稱要打探一下便匆匆收線。
身在溫哥華的藝人黃淑儀接受東網訪問，證實李影在當地離世的消息，她透露在當地時間今日（25日）下午二時左右接到電話指李影過身：「我當時都好震驚，個電話係我弟婦打畀我，佢係李影嘅麻雀腳，好老友，佢話另一位藝人張惠儀當時喺現場，我即刻打畀張惠儀。（李影因咩事過世？）佢幾日前跌親，但佢冇睇醫生，佢同朋友話只係扭傷，冇事，但我哋話去睇佢，佢又話唔好，叫佢出來，佢又唔肯，有朋友就將煮好嘅飯餸放喺佢門口畀佢，我18號先返到溫哥華，約咗李影明天見面，我尋日（24日）打畀佢，佢仲係冇事。」
她續指今朝有朋友致電李影，但無人接聽，朋友於是登門探訪，見李影躺在床上向她表示身體不適及想嘔吐，朋友便召救護車及聯絡張惠儀，張惠儀到場時，見到李影仍是「眼仔睩睩」，救護員到場時即時為李影施心外壓，做了逾半小時，救護人員便指搶救無效，李影回天乏術，其兩名女兒得悉母親有事，已即時訂機票由香港飛溫哥華為母親處理身後事，黃淑儀坦言：「我本來想留番家人公布，因為佢哋好低調，但件事已經傳到香港朋友圈，而且我都算係第一身知道個情況，所以由我講番事件，免得愈傳愈亂。」
黃淑儀稱跟李影相識近50年，心情十分難過，她指對方身體一直很好，沒有病痛，想不到會突然離世：「可能佢唔想麻煩朋友，所以就話自己冇事。」她大讚對方為人好，超級順得人：「我哋成日講笑，話佢仇人都可以打麻雀，佢係唔記仇嘅人，係個好爽嘅人。」她稱李影一直在香港居住，本月14日才回到溫哥華，原定下月會為當地的兒童醫院演出，但如今成泡影。
據指李影早前返港過年，日前於加拿大卑詩省列治文寓所跌倒，今晨（25日）當地傳出朋友上門時，李影指不適惡心於是報警，醫護人員到場後需實以心外壓急救，可惜最後不治。
李影參加麗的電視訓練班後加入娛樂圈，在麗的電視主演過不少劇集，成為麗的當家花旦之一。同期同學包括有韓馬利、麥當雄和劉松仁，她先後拍過《星星月亮太陽》、《半生緣》、《浪淘沙》及《大白鯊》等劇集。李影曾與劉松仁拍拖7年。於1984年，她跟相戀數個月的商人沈海鍵閃婚並移民加拿大，可惜這段婚姻維持幾年便離婚收場，李影獨力照顧兩個女兒，其後試過回流返香港拍劇，不過產量不算多。其女兒沈穎婷為曾被封為「無綫咪神」、2004年參加港姐入行。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
