《流氓師表》是2000年10月上映的香港電影，是乘當年日劇《GTO麻辣教師》而創作，更找來因《化骨龍與千年蟲》而冒起的張家輝，還有蒙嘉慧、杜汶澤主演。雖然最終票房只得87萬，但電影在廿多年來都在網上廣傳，更有網民剪輯一個9分鐘精華版，讓大家一口氣重溫爆笑位。
多謝網民剪輯精華版
回想24年前，麥啟光都承認當日的拍攝手法是幼嫩︰「當時搵羅耀輝（《幸運是我》導演）做編劇一齊創作，個故仔唔難度，係要諗每場戲點拍。呢部係我第二部執導作，根本都未知拍戲係咩？勝在啲對白無無聊聊幾好笑。」麥啟光更多謝有網民將全片剪輯成9分鐘在網上流傳︰「成套戲睇，中間係會有啲悶，剪個9分幾鐘精華就好好笑，感恩有網民做呢樣工作。」
劇本度好晒冇即興
要數《流氓師表》的爆笑位，打二人麻雀、衣櫃起雙飛、用胸圍教數學、打邊爐食避孕套都夠精彩，不過最經典還是要數張家輝與盧惠光在學校門口，一鏡過的「食煙搭膊頭」。麥啟光︰「而家就話識擺好個鏡頭等演員去演，當日根本唔夠時間，一日拍17場戲，仲可以點，只可以擺定個鏡頭等大家演晒成場戲，有時就擺定條路軌，係咪都推部機扮杜琪峯。」
結果這場戲都成為網民最喜歡的一幕，麥啟光︰「證明場戲好睇就唔使搞咁多嘢，兩個演員都好睇。其實成套戲都唔係即興拍，有晒劇本，甚至現場都唔多爆肚，係幾個演員張家輝、杜汶澤、盧惠光都好適合演呢類戲，仲發現盧惠光演喜劇都得。」麥啟光更指當年套戲上映，盧惠光向他笑說，「而家出街被人叫訓導主任。」可見甚有記憶點。而全片唯一現場爆肚改動的，反而是蒙嘉慧個角色名︰「真係現場諗到，佢教地理，又叫魯媚，咪地理魯媚囉，係呢個位即興度出嚟。」麥啟光說。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
