男圑MIRROR成員姜濤於本月30日迎來25歲生日，今日(23日)姜糖（粉絲暱稱）齊集海洋公園出席「海洋王國●生日慶典」，儘管天文台發出黃色暴雨警告，但無礙大批姜糖於大風大雨下，着備雨具及帶備不同應援物品入場，高峰期的港鐵南港島綫更時塞滿姜糖。
而場內設置多達20個打卡位，全身濕透的姜糖忙於四出開心影相留念，同時亦設有4個付費攤位遊戲，姜糖可在此贏取特別設計的不同造型如企鵝、熊貓、海瀨和熊貓等的「小姜姜」及「小濤濤」限定公仔。又見到有大批姜糖聚集在布景板前高舉燈牌及公仔，大聲呼叫，向姜濤送上生日祝福。據大會提供的資料，截至昨晚，約有7,000人登記，劇場坐滿姜糖，大約坐了3,000人。
「姜濤誕」慶典高潮自然是姜濤現身會場與逾3000位粉絲見面，活動3時許開始，先由舞蹈員跳舞及頒發紀念品等環節暖場。身穿藍色衫的姜濤於3時50分現身，他步出後現場粉絲即大聲歡呼，姜濤表現相當緊張，口窒窒說：「有諗過講咩，可能好長，阻阻大家時間。好多謝每一位支持我嘅Fans，過去呢年對自己嚟講都好唔容易，經歷高潮低潮，之前有懷疑過自己下一次生日會，你哋仲會唔會喺度。」粉絲聞言即說：「愛你，冇走過。」
姜濤續說：「多謝你哋繼續喺度，真係唔容易，自己有好多地方做得唔足夠，可以再好啲，好多時諗，覺得對唔住大家，會諗你哋鍾意姜濤係咪值得驕傲嘅事。」粉絲即狂嗌：「好自豪。」感觸良多的他又説：「25歲，年紀已經唔細，由出道到依家濃縮咗人生好多事，好多磨練，慢慢學習變得成熟、大個，亦提醒自己保持出道初心，希望在坐咁多位鍾意姜濤嘅，當我老喇，留喺大家心中嘅種子，會令下一代有追尋夢想嘅力量，可以話畀身邊人嘅聽有人成功過，呢個人叫姜濤。我未必係一個好完美嘅人，但係會追尋自己夢想，希望你哋下一代可以勇敢追尋夢想。」
最後他向粉絲承諾會努力加油：「我會努力加油，會話畀嗰啲對我仲有負面諗法嘅人知道，我會做得更好，我應承大家。」之後全場3000名姜糖齊齊大合唱生日歌為其送上祝賀，姜濤則清唱《好得太過份》答謝粉絲，雖然出現蝦碌忘記歌詞，但姜糖當然照單全收。 之後姜濤與全場姜糖自拍大合照時，司儀問花姐是否一齊拍合照，全場突然寂寂無聲，花姐將電話交給姜濤後即轉身落台，讓氣氛變得有點尷尬。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
