有「絕世好女友」之稱的藝人唐詩詠（Natalie），圈中打滾多年感情生活未有着落。日前，她接受訪問坦言自己在感情上的致命傷是：「唔識將自己唔開心同另一半分享。」唐詩詠表示：「當然有好多原因，對方的原因我唔會講，我自己過去都是因為太注重工作，乜都工作行先，當然都會照顧另一半，但其實我一直唔識溝通，除左最長嗰段感情，對方一觸碰我的底線，我就會走！過去拍拖，我最弱就係溝通，我唔識將自己唔開心同另一半分享，我以為唔講出嚟就冇嘢，最後對方會覺得『點解你唔開心唔同我講？』」
每次公開戀情後唐詩詠均不善處理，表示：「當記者問：『你哋依家點呀？』，原來當時我哋嗌緊交，但我又唔想表露，就唔識點答，亦會為呢關係加上壓力，摩擦就多咗。」對於「絕世好女友」的稱號，她表示：「乜類型嘅男人都係一個小朋友，要需要好似一個媽媽咁去照顧佢嘅感受，你要呵護佢，其實我覺得係有啲攰嘅，但呢個係必須，因為我發現如果你冇呢一樣嘢，佢哋好多時候會覺得被忽略，但係如果你用咗啲語氣唔啱呢，佢又會覺得你煩。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
