麥詩敏接受《香港01》訪問時表示整本書的籌備時間大概為5個月：「咁所以都算快㗎啦，咁就其實真正寫嗰個時間就大概3至4個月到，都好開心嘅，有自己嘅結晶品。」她說到由主播搖身一變成為作家，她就覺得不太難：「可能都係主播記者出身啦，咁我都係寫開嘢多，咁依家變成係寫長啲嘅一本書啦，咁我覺得其實係好多類似嘅地方，都唔算好難。始終可能有啲底啦，同埋我都好開心可以寫自己嘅經歷畀大家睇。」
麥詩敏被問到由主播變成拍攝綜藝節目有否不習慣，她直言最初的確不習慣：「主要要我嘅主播腔呢，佢哋話我嘅主播腔好難搣啊，好似播緊新聞咁樣，咁呢個需要啲時間去調整下。因為我好記得初初拍綜藝節目嘅時候，啲導演都話你可唔可以唔好好似報新聞咁啊？好似睇緊《新聞透視》咁啊，所以都係要啲時間去改變囉。」她說經過不斷的練習，亦有不同的前輩幫忙，令到她可以放鬆一點，所以現在已經有改善了。
去年TVB播出劇集《新聞女王》，劇情是講述主播的工作，麥詩敏被問到有否看此劇及看完後會否懷念主播工作時，她則表示有懷念的：「絕對係有懷念嘅！我離開可能就係因為做得耐想去了解多啲出面嘅世界，轉一轉變，其實我係好鍾意呢個工作，所以睇返佢哋啲情節都會好懷念，同埋佢個劇拍得好好嘅。好真實啦，因為我都知佢哋啲演員係真係會入新聞部度練習啦，跟啲主播去學習啊，咁我覺得都好有趣同埋好睇嘅。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
