王晶與星爺合作過不少經典電影，他憶述第一次與星爺見面是1989年，兩人在電影公司遇上，對方更主動向他示好：「我最記得佢走埋嚟同我講第一句就係『導演呀，有冇機會我同你合作呀？』我話『梗係有啦，你做得咁好，同埋我又係拍喜劇嘅。不過你呢排拍好多嗰啲咩《江湖最後大佬》由頭講粗口講到尾嗰啲，你就唔好拍喇，如果唔係好難㗎！做唔起㗎』。」星爺亦點頭回應。
之後兩人亦在向華勝促成下合作拍攝《賭俠》，並找來劉德華與周星馳合演，但在拍攝期間竟收到劉德華「投訴」：「劉德華就走嚟同我講『喂，所有啲好笑嘅喺晒星仔度喎！咁我點呀？』我話『我盡量加啲畀你啦，加多啲你同陳法蓉嗰啲感情嘢啦』」但結果都不及周星馳搶戲，不過王晶就直言：「我唔係加畀佢㗎，係佢自己諗出嚟㗎，當時佢已經諗好多嘢畀自己，但又好好笑喎，唔通我唔要呀，一定要㗎」而《賭俠》亦大獲成功，票房大收四千幾萬。
王晶與星爺不但合作無間，更私交甚篤，但直至拍攝《鹿鼎記II神龍教》時，兩人友情生變，王晶指：「以前有啲咩私事佢都會同我講，去到神龍教呢，開始有啲疏遠咗，唔知點解中間會有咗個隔膜。慢慢我會發覺係佢想做導演喇，佢唔想受人指揮，亦都唔想俾人估到佢想做乜嘢，因為我當時係好了解佢嘅，我哋成日都會坐埋傾下偈呀，甚至有啲感情嘅嘢佢都會講畀我聽。」王晶憶述當年一件事令他耿耿於懷：「有一日我哋喺新娘潭拍戲，忽然間我問佢『你喺度諗咩呀，諗咁耐』，忽然間佢話『幫你諗緊嘢呀！』」令王晶大感愕然：「點解要用呢種態度呢？冇乜必要呀，開始心度有條少少嘅痕，其實呢條痕就引致咗我哋兩個人開始有裂痕喇。」
王晶表示當年與星爺曾是無話不談的好友，更大爆周星馳的往事：「佢年輕時好窮囉屋企，佢爸爸離開咗佢屋企，得佢媽媽撫養晒佢三個細路仔，只係打一份上海舖嘅櫃面養佢哋，生活過得幾唔好。而好好笑嘅就係佢話點樣識穿佢爸爸出軌呢，就係佢同邊個去偷偷地入咗間戲院度睇戲，就見到佢爸爸同一個女人喺前面睇緊戲，咁佢返去就講畀阿媽聽，結果就冇咗個爸爸喇！」
王晶又大爆星爺的感情事：「當時佢都同羅慧娟好好㗎啦，我話『你而家個女朋友係邊個』，佢話『咁梗係阿娟啦』。」王晶更大爆星爺曾整容：「其實佢眼皮係割嘅，佢亦都講過佢割雙眼皮時有另外一個女朋友啦，嗰時佢匿埋喺佢女朋友新界嘅屋企幾個禮拜，佢女朋友就日日買飯盒畀佢食，呢個係真嘅。」王晶笑言自己當年亦爆過不少秘密給對方知，可見兩人感情深厚。
王晶更大談周星馳初見朱茵時的情景：「我都睇住佢同陳嘉上當時一見到朱茵就對眼都跌咗出嚟咁滯，睇住嘅，睇住佢郁手嘅！」王晶指雖然星爺未有對朱茵開口表達愛慕之情，但他就笑言：「我哋唔使去問㗎，你睇佢個樣就睇到㗎喇！」王晶又指星爺曾分享更私密的事，但就不便在節目中分享。最後王晶透露與星爺自1992年起關係不如以往：「我哋係由好close嘅朋友開始變咗冇咁close喇，疏遠咗。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
