陳豪、張曦雯和丁子朗合演的無綫新劇《俠醫》剛剛煞科，眾演員與劇組昨晚舉行煞科宴慶祝一番。日前拍攝外景時，張曦雯對兩位對手態度迥異，坦言終於等到跟陳豪「談戀愛」，面對丁子朗時則一臉嫌棄。而陳豪拍完劇後繼續搵銀，除了拍廣告外，又跟太太陳茵媺亮相內地綜藝節目公然晒愛，更大爆他們的「第一次」！
早前傳出無綫視帝陳豪一人撐起成頭家捱到殘，日前他與張曦雯（Kelly）和丁子朗（丁丁）在大坑街頭為無綫劇集《俠醫》開工，雖然拍到夜晚，但陳豪依然精神奕奕，與Kelly的拍拖戲令人心心眼。當晚天氣非常翳焗，陳豪不但沒有呻辛苦，更說：「聽講全港只有呢部劇喺度開工，會好好享受同珍惜，拍嘅時候勾起以前好多拍劇回憶。」對於撐起一家的說法，他說：「多謝大家關心，我同廣大市民一樣受生活壓力，唔會多唔會少嘅，但我好享受，屋企人亦好開心，可以為佢哋衝刺，我係感到驕傲，所以從來唔會覺得辛苦。我心態係唔會退休，做得就盡努力去做，令佢哋可以過無憂無慮嘅生活。」並透露拍完此劇後緊接要拍廣告繼續搵錢，並指在經濟環境疲弱下，有工開是上天眷顧。
另外，陳豪之前跟太太陳茵媺現身內地綜藝節目《今晚好犀利》，陳茵媺扭腰跳舞唱歌，二人又大晒恩愛。節目中問到誰是家中財政大臣時，他們表示共同管理，而問到雙方第一次接吻是誰做主動，陳豪表示是自己，更大爆第一次是在車上，說完更扮抹嘴，相當搞笑。
唔吼「人渣」丁子朗
早前Kelly在工作中度過生日，開心有陳豪、譚凱琪、丁丁和劉佩玥陪慶生，感覺幸福：「開工仲好，可以多啲人陪我慶祝，如果唔係可能都係自己一個人過，因為男友飛咗去第二度做嘢，佢知我忙，我都同佢講咗未必放到假。」今次第三度跟陳豪合作，她直言超級開心：「因為係第一次做情侶，可以同陳豪有甜蜜情節，而且係喜劇，好開心！（咁丁子朗呢？）佢由第一集已經成日想追我、溝我，我唔制就用錢撻人，今日又想用錢收買我，我唔受。（佢畀500萬支票都唔要？）呢個女仔好有原則。（角色似你？）係呀！500萬食屎哈哈！」又大讚今次跟陳豪和丁丁合作好開心。完成《俠》劇拍攝工作後，她準備為另一部劇《璀璨之城》開工，中間沒有休息，連買生日禮物給自己的時間都沒有，但自言並非儀式感的人。
至於首次挑戰大奸角的丁丁，自嘲角色好人渣，殺人放火、作奸犯科都做齊，真的是豁出去。他又透露劇中有除衫戲，身形較《奪命提示》時再瘦一點，笑言監製收貨。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
