藝人方力申今日（15日）在大埔超級城出席活動，將做爸爸的小方指太太葉萱現在佗住BB 5個月，將會是蛇年寶寶，性別暫時保持神秘。年初宣布結婚隨後再公布老婆有喜的他笑言是一擊即中，但強調自己是傳統男人，沒有偷步，並不是奉旨成婚。
他又透露計劃培養小朋友學習游水和劍擊，希望希小朋友好似張家朗一樣用左手握劍，笑言要綁住小朋友右手，好好訓練左手，太太也取笑他癡癡地。小方被問到將來可是嚴父？他笑說：「係嚴父，但唔係虎爸，自己都有啲修養，希望小朋友有教養，自己都會做個好榜樣。但係最大挑戰係四大長老，最驚係我阿媽，佢恨湊孫好耐，仲叫我哋唔使請陪月，佢會做埋。」
將為人父的他指現在還未感受到很大壓力，暫時未有太多育嬰準備，但好友黃翠如也有分享，也有不少BB贊助，最估不到是有紮肚贊助。笑問可有結紮贊助？他笑說：「唔使，我仲諗住生多幾個，太太初頭講都話想生3個，但係佗BB嘔完，暫時就話1個先，我就希望生兩三個。」問到老婆佗BB可有脾氣？他笑說：「依家就梗係佢大晒，口味都變晒，有時凌晨想食嘢，就起身煮個麵畀佢食。」問到打算順產還是開刀生B？他說：「呢個都好難決定，佢又想順產，但係又驚痛。自己都驚血，細個試過見血暈低咗，但係唔陪入去產房就死梗，佢都話佢幾痛，就要我感受吓有幾痛，諗住到時着皮褸入產房。」講到婚後還未度蜜月，他指也希望趁BB出世前到陽光與海灘的地方度蜜月，因為BB出世後相信會很忙，更難成行。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
