拉舒福特(左)及阿歷真度加拿祖(右)去意已決。(Getty Images)
曼聯失意球星「大逃亡」，根據「轉會權威」記者羅曼諾(Fabrizio Romano)爆料，有5位紅魔鬼球員正式提出離隊，唔會參加美國之旅季前熱身賽，當中包括前鋒拉舒福特，會方亦宣布將佢件10號球衣交畀新兵馬菲奧斯根夏，「福仔」成為冇號碼人士，執包袱已成定局。
據悉拉舒福特、查頓辛祖、杜維爾馬拉西亞、安東尼馬菲奧斯、阿歷真度加拿祖已經通知會方，表明希望離隊，曼聯方面亦批准佢哋延遲至7月底歸隊，以便5人處理轉會事務。
英國《每日郵報》指曼聯將於下周一(7日)復操備戰新球季，上述5人都唔需要出席，表面上畀佢哋專心「搵工」，實際上避免同領隊魯賓艾摩廉碰面，出現尷尬氣氛，尤其是「福仔」及加拿祖已經同呢位葡萄牙名帥反晒面。
根據英國勞工法例，曼聯即使「禁止」拉舒福特等人參加集訓，但佢哋仍然有權使用球會卡寧頓訓練基地設施及接受醫療服務。曼聯將於7月下旬前往美國踢熱身賽，「脫魔5子」一旦未能完成轉會，月底返回球會獨自操練，都唔會撞見魯賓艾摩廉。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
