藝人張建聲（Justin）入行多年，大眾對他的印象是拍戲瞓身搏殺，經常為角色增、減磅，亦有不少觀眾會記得他的代表作如《反黑》的「招積」、《逃獄兄弟》系列「刀疤」或者《一秒拳王》的「宋傲揚」等，不停游走於不同角色的他，於2022年面對事業不濟、愛情失敗，以及父親離世的3重打擊，再加上日積月累的辛勞，令他身體終於被拖垮，日前公開指當時患上３種情緒病「廣泛性抑鬱症」、「焦慮症」以及「人格解離症」，幸經一年時間積極求醫，後兩者經已痊愈，但「廣泛性抑鬱症」則仍在治療中。
現今社會不少人都受到情緒病困擾，「抑鬱症」、「焦慮症」都頗為普及，至於「人格解離症」，Justin則表示：「2022年確診嘅時候，醫生透過傾談，發現我一個鐘入面會出現3至4個人格，同埋我發現有啲人同我可能合作咗半年、日日見，但一段時間之後，我可以完全唔記得晒，唔係對方同我講番畀番啲相我睇，我真係完全冇記憶，個感覺都幾難接受，同埋，喺我情緒最差嘅時候，我諗過跳（樓）架，但我唔想喺自己最落泊嘅時候咁樣離開，同埋仲好想拍戲，係呢啲信念令我無跳到。」
Justin得悉自己患病，沒有諱疾忌醫，相反積極去面對，經過一年不斷覆診、食藥，再加上聽醫生說話，想說話時盡情去傾，令「人格解離症」、「焦慮症」慢慢步入康復，原本他沒打算公開自己病情，但因看到陳奕迅都坦然面對自己的情緒病，公開病情，令他亦覺得自己應該走出來，並以過來人的身份，勉勵同路人，他謂：「如果發現自己情緒有問題，唔使驚，去睇醫生，我係先睇心理醫生，由佢哋評估我需要食藥，再轉介去精神科，依足醫生指示食藥，唔好自行停藥，仲有盡量遠離社交平台，有時太過着重社交平台嘅流量、評論，唔係一件好事。」
Justin還指希望外界對情緒病多些理解、包容，不要強加負面標籤：「情緒病唔係黐線，只係好似感冒咁，要食藥去醫，之前有啲網民話我唔去Keep，肥腫難分、好Hea，但其實係因為我食緊藥，佢哋知唔知背後嘅事？大家喺批評別人嘅同時，可唔可以有番啲基本嘅尊重，唔好乜嘢都只係睇表面。」
為方便工作，現居於廣州的張建聲，直言除了不斷去搵拍戲機會之外，平日生活都非常簡單，原本在廣州認識了一位女生想發展，但因他仍未忘記前度女友Angel，故沒有更進一步；至於工作方面，他剛拍畢3部香港、內地的電影，亦會嘗試其他不同方面的發展，如接品牌廣告推廣等，為自己事業注入生機。
防止自殺求助熱線：
香港撒瑪利亞防止自殺會： 2389 2222
生命熱線： 2382 0000
社會福利署： 2343 2255
撒瑪利亞會熱線(多種語言)： 2896 0000
醫管局精神健康專線： 2466 7350
明愛向晴軒： 18288
東華三院芷若園： 18281
「情緒通」熱線： 18111
賽馬會青少年情緒健康網上支援平台「Open噏」：http://www.openup.hk
本文作轉載及備份之用 來源 source: http://hk.on.cc
|
鍾意就快D Share啦！
|
|
|
