「軒公」張敬軒早前在社交網分享近期最愛吃的芝士菠蘿包，豈料引起粉絲罵戰，更徹夜未眠開火。事關有網民指出該餐廳偷工減料用內地產的冰鮮菠蘿包，認為張敬軒不應幫該餐廳宣傳，甚至狠批粉絲會「無腦」盲目跟風，對此張敬軒徹夜回覆，解釋本身對餐廳背景並不了解，但認為網民措詞過激，豈料該網民咬住唔放，更有骨突然以「軒」相稱，令張敬軒終忍不住發火：「軒咩軒，你哋平時鬧我嗰陣時唔軒？」認為大家均有思考能力，不會因其一兩句說話已左右，更重申從未視自己為偶像。
他今日出席活動，提到清晨在社交網「教仔」相當勞氣？他說：「冇大火，教仔啫，有邊個做阿爸、阿媽唔勞氣，覺得佢哋有時喺網上講嘢冇禮貌，佢哋用我個樣做icon，人哋睇到會入我數，明明我冇種口孽，但係啲口孽就入我數，唔鍾意佢哋咁易着，明白依家網絡係一個發洩嘅地方，自己搞咁多講座希望超度大家嘅EQ、IQ，希望大家和氣啲，財運都好啲。其實都儲儲埋埋㗎喇，開關之後多咗內地粉絲，多咗中港矛盾，上次浸大佢哋都口角，嚟見artist最緊要開心，要教佢哋囉。」他又指是小事，平日見有錯鬧得更爆，明白父母為何如此勞氣，已經當了粉絲像仔女一樣。
一早大動肝火的軒公受訪時更聲沙沙，他說：「唔係唔舒服，因為之前食咗啲哮喘藥，把聲係會沙，醫生提議不如食耐啲，因為疫情之後，真係差啲，感冒都搞咗兩個月，冇咁熱會做番啲運動。」
講到音樂學院，軒公指快將開班，暫名會叫作「HINS ACADEMY」，入門班會有過萬名額，開32班，之後還會有進階班1對16人和「天價」的1對1課程，親自教授的他笑說：「我咁鍾意講嘢，好快啫，1日3班，每堂兩個鐘，大概幾百人一班，學校已經搞掂，課程好實用㗎，會係講坐形式，唔一定唱歌先報得，要講嘢用聲都啱。」他又指開辦學院的原因見不少年輕人抱住躺平心態或對前景感到迷惘，但不會以歌唱比賽形式進行，會似一間造星學校，最後會有一個網上演出，希望讓學員認認真真去學做明星，能夠搵食，家庭有困難的學員更加有獎學金，笑言獎學金要靠他募捐「劫富濟貧」得來。
講到早前在社交網分享「意大利風月小電影」，片中性感地激罕赤裸上身外，更有下身半裸着褲鏡頭，雖然畫面模糊處理，但也相當香艷，軒公則笑說：「唔sexy，尺度好細啫，唔知係咪近得Tyson Yoshi多，又火爆，又唔鍾意着衫，畀佢傳染咗。嗰段片純粹係去到意大利，租咗間古堡唔好嘥拍下嘢，冇其他㗎喇，更大尺度就要付費會員先有得睇，好嘢慢慢嚟啦，只係頭盤嚟啫。」此外，軒公走近粉絲打招呼影合照，有粉絲搞笑地再三「搏鬧」：「你鬧我」成功搏得軒公一笑，並以口形回應說：「我...！」認真搞笑。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
