約基利斯取得加盟阿仙奴首個入球。(Getty Images)
去片睇約基利斯入波
周日(10日)凌晨熱身賽「酋長盃」，阿仙奴主場以3比0大勝西甲球隊畢爾包，勇奪冠軍！新加盟「神鋒」約基利斯第3次披甲，終於展現6,400萬鎊(約6.8億港元)身價，以「強力頭槌」勁頂入網，取得入「廠」後首個入球，正好為下周日(17日)晚英超首輪賽事作客曼聯壯行色。
阿仙奴上月訪港鬥熱刺，約基利斯後備落場上演「地標戰」，上場熱身賽對維拉利爾，佢正選上陣冇乜建樹，兵工廠更加輸2比3。呢位27歲瑞典國腳今仗繼續擔正，終於發威，踢到35分鐘，接應蘇比文迪右路傳中，勁頂入網打破僵局，發揮中鋒重大作用，阿仙奴總算買啱人，搵到最後一塊拼圖。僅過2分鐘，兵工廠2位翼鋒合作，加比爾馬天尼利橫傳，布卡約沙卡射成2比0。
換邊之後，阿仙奴主帥阿迪達作出多次換人，包括71分鐘由夏維斯入替約基利斯，呢位德國國腳把握機會爭取表現，應接布卡約沙卡妙傳，單刀射成3比0。
阿仙奴以往缺乏中鋒情況下，經常由中場夏維斯扮演「假9」，但隨住約基利斯及蘇比文迪加盟，勢必影響夏維斯新一季上陣機會，佢今仗以入波證明自己有能力同約基利斯競爭。阿仙奴踢咗5場熱身賽取得3勝2負，今仗鋒線球員火力全開，可望增添首輪英超對曼聯嘅勝算。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
