
曼聯今場表現比上季大有進步。(Getty Images)
曼聯英超第1擊雖敗猶榮!全新嘅「紅魔鬼」今場表現比上季大有進步,主場㩒住阿仙奴進攻,可惜龍門位置又一次出事,比恩迪亞解圍變助攻畀人入波,最終0比1落敗。領隊魯賓艾摩廉賽後被問到下場會唔會再換龍門,佢就激動辯護,但大讚曼聯今季有力擊敗任何英超球隊,唔會再踢悶波!
周一(18日)凌晨「仙魔大戰」,曼聯派出麥比奧莫同馬菲奧斯根夏領銜全新鋒線,大部份時間壓制阿仙奴,不過13分鐘防守角球出事,代替奧拿拿把關嘅比恩迪亞,喺門前亂軍中打手錘失誤,個波飛入自己龍門前被卡拉費奧利加一頭頂入,贏形勢下都要先落後。
曼聯失球之後反而愈戰愈勇,根夏同麥比奧莫多次憑一己之力製造埋門,可惜最後一腳唔係失之交臂,就係被「上身」嘅大衞拉耶神救,加上柏德列多古曾有遠射中柱,曼聯尾段出埋新加盟前鋒班捷文施斯高,都冇辦法扭轉敗局,今季首仗又要輸波。
曼聯今場棄用已經傷愈嘅奧拿拿,但比恩迪亞一樣出事,艾摩廉被問到下場會唔會改用3號門將湯希頓,佢就激動回應:「點解?因為失咗呢球?」記者提到比恩迪亞上季對熱刺都有累似失波,艾摩廉表示:「因為嗰場冇VAR,有VAR就係犯規。當對方咁樣觸碰門將,門將就要選擇推番轉頭定接波,比恩迪亞選擇接波,但就保護唔到自己。如果球證容許咁樣壓逼龍門,咁我哋之後都要咁做。」
雖然首仗全失3分,但艾摩廉對球隊表現就有極高評價:「我哋比上季更有侵略性、有更多衝刺同更勇敢,組織嗰陣亦更少失去控球,最重要係我哋唔再踢悶波!我以球員嘅表現為榮,對住強大嘅阿仙奴都可以踢得咁好,曼聯依家有需要嘅球員,可以戰勝英超任何球隊。」
本文作轉載及備份之用 來源 source: http://hk.on.cc
鍾意就快D Share啦!
|
|