(Getty Images)
周六晚10點場焦點賽事,曼聯主場迎戰般尼。「紅魔鬼」今場初段係威係勢,但換邊後突然走樣,最終戲劇性贏3比2,總算打開勝利之門,但有新簽前鋒馬菲奧斯根夏受傷,主帥魯賓艾摩廉贏波都笑唔出。
曼聯開局表現醒神,先有麥比奧莫勁射,但被般尼門將杜巴夫卡救出,15分鐘又有基爾獲加同美臣蒙特鬥搶倒地,球證一度判般尼12碼,但VAR團隊推翻判決,般尼逃過一劫。
戰至27分鐘般尼終於失守,曼聯一次死球攻勢,卡斯米路頭槌頂中楣,反彈般尼中場祖舒古倫身體入網,杜巴夫卡雖救出,但球證表示已過白界,曼聯繼上場對富咸後,再度靠烏龍波領先。
上半場餘下時間,曼聯多次製造驚險攻門,可惜無論阿密特迪亞路,定係後備入替嘅約舒亞舒克斯都錯失良機,半場曼聯領先1球。
下半場再開風雲色變,曼聯後防突然空虛,被利尼科士打近門得手,55分鐘般尼追和1比1,不過般尼都未慶祝完,曼聯中圈再開就由麥比奧莫近門破網再領先2比1,亦係曼聯今季聯賽首個非烏龍入球。
60分鐘利尼科士打再度打穿曼聯防線單刀破網,VAR判決利尼科士打膊頭越位,入球無效,不過6分鐘後曼聯仍然頂唔住,般尼一次門前混戰,查頓安東尼亂軍中建功,追成2比2。
補時階段,阿密特迪亞路禁區內被查頓安東尼拉衫倒地,球證翻看VAR後判罰12碼,般奴費南迪斯補時7分鐘主射入網,最終曼聯以3比2絕殺對手。
本文作轉載及備份之用 來源 source: http://hk.on.cc
鍾意就快D Share啦!
|
|