尼馬同爸爸嘅感情獲神秘富豪肯定。(Getty Images)
巴西球星尼馬近年事業下滑，不過多年征戰球場同擔任代言，仍然係巴西最有錢運動員之一，估唔到最近仲天降橫財，離奇繼承一位富豪嘅10億美元遺產！據報該神秘富豪膝下無兒亦未有家室，佢被尼馬對家人嘅真挈照顧感動，決定將所有遺產相贈，引起球迷熱話。
呢次離奇遺產繼承事件由巴西媒體《RIC》同《GZH》曝光，之後獲各大媒體轉載。據報該住喺南里奧格蘭德州嘅富豪約31歲，今年6月喺兩位見證人見證下，去律師樓定立遺囑，確認死後將所有財產贈予尼馬，當中包括現金、物業、投資同公司股份，總值約10億美元。
報道指呢位神秘富豪已經離世，單身嘅佢膝下無兒無女，父母亦已經過身，喺媒體曝光嘅遺囑內，佢表明今次立遺囑係喺「自由意志、冇被強逼或誘導」下定立。不過報道亦指，遺產繼承程序涉及複雜法律問題同稅務問題，仍然要等待巴西法院作最後批核。
事件最受球迷議論地方，係富豪同尼馬從未見面，點解會將巨額財富轉贈？據報富豪曾向朋友表示：「我鍾意尼馬，我好認同佢嘅價值觀。尼馬同佢爸爸嘅聯繫，令我諗番起自己同已去世爸爸嘅點滴。」
對於突然承繼10億美元遺產，尼馬代表團發聲明指「未收到任何通知」，所以不作評論。依家效力山度士嘅尼馬，曾效力巴塞隆拿、巴黎聖日耳門同希拉爾等球會，有指佢喺承繼遺產前，身家已達10億美元。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
