由於傳統京劇妝要將「眉毛吊起」加「兩撇滴水」，令德德恍如體驗了易容術般的「Make Up」，德德笑言:「我覺得好似打機嗰啲角色。」並一再對鏡質疑：「個樣唔係我嚟」。德德事後補充指上完妝後，感覺「樣聲分離」，相當奇怪：「最有趣係，化完妝嗰刻，我望住自己個樣完全唔覺得係自己嚟，但一開聲就搵番我自己，變咗好奇怪；個樣明明唔屬於自己，但自己把聲就喺嗰個樣度出現。」
馬貫東爆笑暗踩德德肥面?「個妝將你面形收細咗」
「易容」後德德的出場，即惹來馬貫東及丁丁瘋狂爆笑，丁丁「大讚」:「捉緊潮流 2025 年胎毛瀏海！」決定放棄人生的德德，自毁式搞笑問馬貫東：「靚唔靚？」馬貫東亦「明讚暗踩」搞笑謂:「你不嬲都靚啦，將你面形收細咗，將你嗰啲肥肉呢......」德德聽畢即場作勢「拎刀行住」馬貫東，場面爆笑。丁丁及東東則挑戰京劇經典高難度動作「月亮門」,嘗試將腿踢過額頭位置，考驗其柔韌度及身體協調；結果出名爆肌兼力量型的丁丁，以驚人柔韌度踢出「過額」新高度，令全場拍爛手掌。
大歎「宮廷菜天花板」
除了深入體驗北京傳統文化，三人還去了有「宮廷菜天花板」之稱的米芝蓮一星餐廳，其中一度特色菜是傳統北京棗木烤鴨,除有師傅現場即席片皮，還有特色「崖蜜黑松露醬」配合調味，對黑松露情有獨鍾的東東品嚐後即輸出專業飲食節目主持 bite：「甜鹹互相輝映」、「黑松露味好出」、「鴨皮好脆！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
