由林敏驄、陳穎欣（Yanny）及柯煒林等主演的電影《觸電》今日（14日）舉行首映，早前缺席宣傳並一度傳出失聯的羅莽這次終於蒲頭，與其他演員盧慧敏（Amy Lo）、伍詠薇、陳毅燊、蘇皓兒及羅莽等都有出席。現場所見羅莽面容有點憔悴，活騷後亦因精神欠佳未能受訪，急急腳離開。
林敏驄受訪時解畫早前羅莽失聯一事：「通常都係唔見咗電話啫。（有冇關心佢咩事？）佢咁大隻有咩事，有神功護體㗎嘛。（你個時搵到佢太太？）監製搵到，上次已經報平安。」他又指戲如人生，戲中多個九唔搭八的人走埋一齊，好似他們拍戲時遇上失聯及患病等問題，發生很多意想不到的事，但相信只要走埋一齊便會有好成績。
林敏驄又指連埋今日自己已是第4次觀看電影，直言感激觀眾們的支持，問到若電影票房好會如何回饋觀眾，他則笑言：「同羅師傅（羅莽）對打（羅師傅話踢腳都無力喎）吓，冇力咩，咁我嚟踢佢啦，踢嚟踢去都唔郁。」至於羅莽雖有現身出席但因精神狀態欠佳未能受訪。
Yanny與Amy Lo皆表示上映後首次觀看電影，戲中飾演林敏驄女兒的Yanny指兩人的父女情搞笑比感動更多，故事亦會引起共鳴感；而戲中化身林敏驄虛擬電競角色的Amy Lo則笑言可能是因為兩人相似，名字中都有「敏」字，又透露拍攝動作戲時曾意外傷及膝蓋，更自爆拍攝完畢後取走角色所使用的盾牌回家放在床下底作紀念。問及有否關心柯煒林（Will），Amy Lo就指：「我諗大家都知佢身體上嘅嘢，身體健康最重要。（佢之前都有出嚟做嘢。）好戥佢開心喎，佢身體點都好佢都盡自己努力去工作，覺得好感動。」
至於即將在下年1月中舉行婚禮的Yanny，表示目前忙於專注排練10月演出一連3星期的舞台劇，笑指籌備婚禮方面暫時全權交由未婚夫處理：「其實佢都好忙，大家都係咁畀人追殺作決定。」又指預計前組合Super Girls未能全員出席。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
