周六（27日）晚英超頭場，曼聯貴價前鋒班捷文施斯高雖然取得加盟後嘅開齋士哥，但隊長般奴費南迪斯再度射失12碼，最終作客以1比3不敵賓福特，打回原形。
曼聯挾上仗擊敗車仔嘅勢頭，作客賓福特力求乘勝追擊，今仗以馬菲奧斯根夏、班捷文施斯高及倒戈嘅麥比奧莫組成3叉戟攻堅。不過賓福特藉主場之利欲先發制人，開波僅8分鐘，佐敦軒達臣後場大腳長傳，伊戈泰亞高突破越位單刀勁射破網，極速打開紀錄。
去到20分鐘，「蜜蜂仔」照辦煮碗再來一記長傳，奇雲舒哈迪窄位快射被救出，伊戈泰亞高門前補中梅開二度。連失兩球嘅曼聯如夢初醒，26分鐘施斯高先施頭槌被撲出，立即執雞又過唔到基利靴，佢再三補射得手，終於取得加盟紅魔後嘅首個入波。
易邊後大家都互有攻守，去到71分鐘麥比奧莫殺入禁區被拉跌，球證直指12碼，可惜般奴費南迪斯操刀被基利靴救出，呢位隊長繼次輪聯賽對富咸後再度射失12碼，完場前「蜜蜂仔」靠馬菲亞斯贊臣遠射靚波，最終曼聯輸1比3，上仗勇挫車仔只係曇花一現，領隊魯賓艾摩廉仲未攞到上任後，聯賽2連勝。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
