格拉斯拿領軍攻力備受認同。(Getty Images)
曼聯今季成績仍然持續低沉，領隊魯賓艾摩廉下台壓力愈來愈大，普遍輿論認為，一旦紅魔鬼周六(10月4日)晚英超主場未能擊敗新特蘭，呢位40歲葡萄牙少帥就會被炒，水晶宮領隊格拉斯拿被視為接任大熱人選，佢回應話對於成「魔」持「中性、輕鬆」態度，似乎有興趣坐呢個「三煞位」。
曼聯今季英超6戰只有2勝1和3負，排第14位，加上英聯盃被乙組仔甘士比淘汰，球迷要求換帥呼聲愈來愈大，一般估計下場對新特蘭，將成為艾摩廉「審判日」，一來對手係新升班球隊，如果曼聯失分，會方冇理由再保住佢。
二來踢完呢場比賽，英超就會休戰，讓路畀國際賽，屬於換帥好時機，令接任人有比較充裕時間備戰，尤其是10月國際賽之後，曼聯首戰就要作客鬥利物浦，如果繼續由艾摩廉領軍，隨時遭受災難性敗陣。
格拉斯拿成為下任曼聯領隊大熱，呢位51歲奧地利名帥上年2月臨危受命擔任水晶宮領隊，上季更領軍打入英足盃決賽擊敗曼城，協助球隊勇奪創會近120年首個大賽冠軍。
今季英超開鑼前，水晶宮憑互射12碼擊敗利物浦，捧盃社區盾，兩隊上場英超交鋒，水晶宮再贏2比1，今季聯賽6戰3勝3和，排第3位，格拉斯拿成為紅軍剋星，領軍攻力備受認同，所以曼聯視佢為新帥首選。
格拉斯拿接受德國《踢球者》訪問，講到會唔會執教曼聯，佢話：「我會以中性、輕鬆態度對待呢個問題，現時只會專注水晶宮事務。」格拉斯拿明顯留有成「魔」餘地，同時唔想得罪水晶宮，佢將於明夏約滿，如果曼聯出手挖角，應該唔需要支付太多賠償金。
除咗格拉斯拿之外，般尼茅夫領隊伊拉奧拿、前英格蘭主帥修夫基、前巴塞隆拿教練沙維都係曼聯下任領隊潛在人選。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
