樂壇小天后炎明熹（Gigi）與無綫因為合約問題被雪藏多時，神隱多時的她，今日（29日）亮相由李敏執導及編劇、Johnny Yim擔任音樂總監的音樂劇《一束光——高錕的記憶》的記者會宣布參演，正式「復出」，而無綫沒有派員到現場採訪。全身黑色裝束的Gigi台上晒V又嘟嘴，與周國豐對談時笑到彎腰，心情興奮。劇中她演高錕腦裏面的「未來少女」一角，已綵排了3、4日。
對於再踏舞台感壓力好大，她自言易焦慮及要求好高，希望每件事都做到最好，會盡力加油，唱歌跳舞和演戲拆開做已不容易，一齊做更難，已慢慢跟上，雖然緊張想享受舞台，相信再綵排多幾次就會更好。問到現在身份？她宣布正式與無綫合約結束，更開始自問自答表示：「係咪自由身？係嘅！已經有一段時間，我不嬲都好自由，依家開咗一間細細嘅工作室。」又表示：「工作室計埋我有4個人，唔記得成立咗幾耐，之後會以獨立歌手身份接工作。」至於工作室的名字來自她的口頭禪「然後」，用「然后」因為不想撞名，英文名原本「Natural Queen」覺得太誇張改為「Natural Quality」，之後希望向前輩和音樂人取經，暫時工作室主力做這個音樂劇，之後會搞粉絲聚會。
她表示自己工作室自己話事初很不習慣，有好多想法但沒有一次講出來，有時在床上又有新諗法，自認是麻煩的人，與同事在磨合中，暫時是順利，同事都知道她想法好多，笑言有工作大家可以直接找她。她否認之前傳聞她8位數簽內地公司、簽英皇及Sony等，但承認有很多人找她，暫時不會簽公司，希望趁現在這年輕試新嘢，問是否不再簽公司？她表示不會，現在只是模式不同，好佩服前公司耐心的裁培，決定踏出一步，預了面對困難，會盡量加油。好感謝TVB的裁培？此時Gigi緊張得標手汗：「冇錯，始終由比賽出來，會一直記住呢份恩情，如果將來有合作機會會捉住，同埋好唔捨得好多人。」問到最唔捨得邊個，她眼圈一紅，忍住淚水，用紙巾抹眼淚和鼻水，表示不捨得廠內的工作人員：「佢哋睇住我長大，好記得《聲夢》總決賽時好緊張，廠好凍，大家畀咗好深的擁抱我，話我一定得，佢哋唔係培養我嘅人，係陪伴的嘅人，想證明佢哋睇無辜負佢哋。」
提到之前在社交平台爆喊，她表示喊是因為感到少許迷惘，不知道未來方向，當清楚方向後便全力冋前。幸無情緒問題，雪蕆逾年這段時間，她非常充實好開心，上堂學唱歌、跳舞、返學外，又去了北京跟朋友學拍攝。笑言像入了「焗爐」焗住做好多事，對於由「雪櫃」跳入「焗爐」，她講笑：「我由冰鮮雞變鹽焗雞，因為我屬雞。」
她透露之前去了石家莊探望外公外婆，見到親人感覺好有溫度，表示家人有點擔心她，尤其由細養大的姑媽姑丈，自小視她如女兒般看待：「希望佢哋唔好擔心我，我會慢慢長大，身邊有錫我嘅同事，父母會畀建議我，我會好好過濾。」
今次Gigi頭炮復出參演的音樂劇為場館的開幕音樂劇，將於11月15日開始共演出10場。她大唱多首Johnny為音樂劇度身訂造的歌曲，昨日Gigi走入錄音室一口氣錄好3首歌，今日Gigi獲大批粉絲撐場，人氣不減。
該劇講述「光纖之父」高錕的成長故事，演出陣容還有海兒、葉巧琳、周國豐和飾演高錕的鄭君熾。海兒飾演高錕媽媽表示大挑戰，有向媽媽吸取經驗，覺得媽媽好偉大，視仔女和家庭是人生的宇宙。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
