影帝梁朝偉前晚亮相公開活動，心情大靚的他，受訪時妙語連珠，談到新片中有全裸戲份，他自覺不感震撼，絕對贏不過《色，戒》，至於事前有否操Fit「迎戰」該場戲，他笑謂：「又唔係參加健美先生！」早前雖未能於「威尼斯電影節」中稱帝，但偉仔並不介意，還預告將會接拍網劇，繼續享受拍戲的樂趣！
梁朝偉前晚狀態十足，面對傳媒拍照，風騷大擺「心心」甫士，受訪時更有問必答，無所不談，還不時大晒「朝」式幽默，令整個訪問笑聲不斷！談到有關投資的話題，他直指物業是主要投資項目，至於是否全球各地都有物業？他笑說：「只不過係有啲地方自己成日去，咁咪有個地方可以『擺下嘢』囉！」日本便是其中一個地方，方便滑雪。
近期偉仔正忙於為首部主演的歐洲電影《Silent Friend》宣傳，並將繼續參與不同影展，談到該片於「威尼斯電影節」口碑很好，可惜他卻失落影帝獎項，對此偉仔並不介意，並笑謂：「攞過咁多，有乜所謂吖！」提到電影中有一幕全裸戲份，不少觀眾看後都表示震撼，他則笑稱：「唔係吖，《色，戒》震撼好多！（喺大自然拍裸戲舒服好多？）好唔一樣嘅，你到時睇吓咪知，哈哈！（事前要做準備？操肌？）唔使，做咗咁多年，又唔係參加健美先生！」
得悉宋仲基撩鬥戲
早前，偉仔到韓國出席「釜山國際電影節」宣傳新戲，問到有否獲韓國片商邀請拍電影？他說：「有呀，但真係好難，韓國話真係好難學，我睇完湯唯（作品）之後都好佩服，真係一個好難學嘅語言，有機會我都唔介意嘅，只要解決到語言上嘅障礙。」提到韓國型男宋仲基表示很想跟他合作，偉仔表示知道，並相信一定有機會。談到他早前接受藝人陳冠希訪問，自爆有不少有趣習慣例如穿鴛鴦襪，他說：「令自己開心啫，整啲嘢氹吓自己，食吓雪糕、着得意嘅衫，係一種小確幸。（佢話你型過佢！）我唔敢。」
談到未來工作，偉仔表示正在看劇本，透露除了電影，亦有電視劇、網劇邀請：「因為依家有好多平台，有啲唔係一部電影，或者拍6、7集嘅都好流行。有時拍吓呢啲都幾好玩，佢嘅長度係可以更好玩啲，通常拍一個Season，好嘅先繼續再拍，唔好就Cut咗佢。」他表示並非內地劇或港劇，預計起碼明年才開始拍攝。對於不少網民集氣想偉仔與周潤發可以再合作，再創經典，偉仔即笑謂：「發哥肯做至算」
另外，偉仔明年將會為在港舉行的Dragon級別帆船世界錦標賽擔任活動大使，他搞笑指是「畀人捉去」，還指曾跟友人到匈牙利參加一場國際帆船賽並獲得亞軍：「有60隻船參賽，賽1個星期，每日6點賽到下晝5點，賽咗3場。今次咁啱喺香港搞。（你會落場比賽？）唔知到時會唔會，暫時話會落去賽。」而平日有跑步習慣的偉仔，對於不時有網友分享偶遇他的照片，更稱曾跟他閒聊，偉仔即一頭霧水，笑謂：「我冇同佢哋傾偈喎！我淨係跑過，say hello咁樣咋，最多影張相。」話口未完，偉仔昨晨跑步時再被偶遇，他亦親民地讓跑友「影張相」，而下午他轉赴澳門，又一次被「捕獲」，不少網民遇見偉仔於酒店內睇車，更坐上一架跑車「感受」，據知他此行是前往睇籃球賽。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
