視后胡定欣昨日投下震撼閃光彈，在社交網宣布與醫生陳健華完婚，兩人瞞天過海到新西蘭辦喜事，一眾圈中兄弟姊妹都被蒙在鼓裏。如今定欣終於圓夢披起婚紗，就連舊愛馬國明都不禁祝福兩口子白頭到老。
現年44歲的胡定欣曾與吳浩康、馬國明拍拖，可惜未能開花結果。單身9年的她，去年底宣布結交圈外男友陳健華，隨即惹來全城關注。作為外科醫生的陳健華身材健碩，更善心爆棚，多次出任無國界醫生，不少人都認為他便是定欣的真命天子。昨日適逢中秋節人月兩團圓，定欣在毫無預警下於社交網投放閃光彈，宣布正式成為陳太！
她分享多張婚照，發文道：「Akin & Nancy 03.10.2025！」原來二人遠赴新西蘭拉埋天窗，定欣身穿杏色露肩婚紗搭配珍珠耳環，簡約又優雅，手上的鑽戒亦相當吸睛，她面露甜笑，在美景之下和陳健華齊齊切蛋糕。其後她再出Po，曝光更多結婚照片，並Sweet爆表示：「好時辰先找到你，天公對待我真好。」一對新人拖住手仔在湖邊漫步，身旁盡是一片綠油油的草地，唯美又浪漫。
舊愛馬國明力讚登對
定欣突然宣布婚訊，獲全城祝賀，作為舊愛的馬國明昨日為節目錄影，受訪時直言戥對方開心並送上祝福：「祝白頭到老，身體健康，恩恩愛愛！（親身恭喜佢？）會傳短訊畀佢。其實之前我喺深圳同佢嘅好姊妹姚子羚開工，對方都完全冇提過，我諗子羚一早已經知，但好守得秘密。」已為人夫的他，被問到有沒有夫妻相處之道可以過兩招？他笑言不懂教人，但雙方一定是相處融洽才會結婚，又表示沒有見過陳健華本人，但單看照片已覺得二人很登對。
雖然馬國明指姚子羚為姊妹保守秘密，但原來今次定欣飛新西蘭完婚，就連「胡說八道會」的閨蜜也被蒙在鼓裏！黃智雯接受本報訪問時表示：「係呀，我哋都好驚喜，但係好戥佢哋開心，好登對！」至於胡蓓蔚也送上祝福：「Huge congratulations to Dr chan & Nann，白頭到老，幸福美滿！」姚子羚則留言：「Congratulations to u and akin，幸福快樂、甜甜蜜蜜！」
而9年前與定欣傳緋聞的視帝陳展鵬，則為對方找到幸福而開心，他說：「今日睇到消息，好戥佢開心，祝白頭到老、永結同心。知道佢都好鍾意小朋友，可以快啲生番個寶寶，家庭美滿。」至於閨蜜林夏薇則謂：「我喺內地拍緊劇，今日一早恭喜咗佢，好戥佢開心，感動，恭喜新婚快樂，永遠幸福！」
保密工夫滿分！陳山聰袁偉豪嗌驚喜
由胡定欣、陳山聰、袁偉豪和單立文等幾Pair人組成的「將軍澳街坊福利會」出名老友，每逢生日節慶都會相聚，如今定欣突爆結婚，一眾「兄弟」卻表示事前不知情！陳山聰昨日接受本報訪問時謂：「我同你哋都係同一時間知道，好開心、好激動，衷心祝陳醫生同我呢個好姊妹百年好合，永結同心，永遠都幸福快樂。陳醫生又斯文靚仔又高大威猛又事業有成，冇得頂啦，真係好開心，衷心祝福佢哋！」至於袁偉豪亦謂：「大家開心都嚟唔切，唔怪得過時過節搵佢又冇覆電話，山聰生日我哋食飯搵佢又唔見，仲以為佢做乜，原來係一件喜事。」
洪永城撮合新人功不可沒
藝人林盛斌（Bob）成功撮合胡定欣與陳健華，再次凸顯他的金牌媒人地位！他昨日現身電視城錄影節目時開心表示：「今朝一早收到定欣嘅短訊，佢同我講咗好多心底話。（你都係頭先先知？）可能佢想保護私隱，如果佢請我去婚禮，呢排我都周圍飛公幹，未必出席到。」Bob還表示尚未知定欣返港後會否補擺喜宴：「如果係就唔好搵我做司儀，我要坐定定盡興。（飲新娘茶？）你都唔係話，當年朱慧敏出閣，我直情帶佢入場，真係好似爸爸咁！」他又謙稱今次「配對成功」並非自己個人的功勞：「其實陳醫生係洪永城嘅朋友，只係中間我哋搞咗個小型派對，約咗佢哋出嚟食廚師發辦，咁都有『售後服務』嘅，我成日問住定欣發展成點，佢哋都拍咗拖年幾兩年，絕對唔係閃婚。（定欣有咗？）你要問佢先知，定欣有喜不得了！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
