施斯高近2場聯賽入波，仍然被經紀睇死。(Getty Images)
今季英超開鑼已經2個月，一眾新加盟球員都交出初步成績表，《The Athletic》早前搵英超20位經理人進行投票，選出夏天最差、最佳收購調查，結果曼聯前鋒班捷文施斯高，意外高票當選「最差收購」，連名宿舒米高都質疑曼聯簽施斯高嘅動機。
曼聯用7,400萬鎊高價簽入施斯高，佢轉會後頭6場比賽都冇入波同助攻，直到近2場聯賽開始入局，對賓福特同新特蘭連環取得入球，不過隨後為斯洛文尼亞踢2場世盃外再次「死火」，周日(19日)「雙紅會」作客利物浦，有冇貨交令人懷疑。
《The Athletic》調查顯示，20個英超經理人當中，6個選施斯高係今季最大「水貨」，壓倒有3票嘅曼城門將占士查科特，包括域斯、阿歷山大伊沙克在內12名球員各有1票。部份經理人解釋：「曼聯喺壓力下被逼做出嘅收購」、「用太多錢簽一個級數唔太高嘅球員」。
最佳收購方面，曼城簽入基安盧基當拿隆馬，獲5位經紀認為係最好交易，愛華頓借用基亞利殊有4票排第2位，阿仙奴簽約基利斯就有2票，麥比奧莫、伊沙克、祖奧柏度、沙維西蒙斯、蘇比文迪、伊比爾治伊斯、雷恩達斯等各有1票。
曼聯傳奇舒米高日前亦加入質疑施斯高行列：「簽施斯高真係好古怪，曼聯本身已經有海倫，佢喺有供應情況下一季可以入25球，但曼聯就用超過7,000萬鎊去買施斯高，反而唔理中場空缺。點解要簽一個唔急切需要嘅人？因為個轉會總監(韋維爾)嚟自RB萊比錫，佢想用一單收購幫自己省招牌。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
