尋日（9日）48歲生日嘅李珊珊，前晚（8日）於網台節目《珊珊大爆發》開live，邀請同月同日生日的好朋友郭晉安上節目。幕後喺凌晨12點、踏入二人正日生日之際，為兩位壽星送上生日蛋糕慶祝，安仔公司嘅工作人員仲拉住「出道61年歸來依然是少年」嘅Banner到場，大讚佢註顏有術。剛踏入61歲的安仔，笑言抗拒後輩叫他做安叔：「叫番我做安哥哥！」安仔又笑稱︰「最尷尬係叫阿偉嗰啲！」珊珊即笑：「梁朝偉，叫佢偉哥哥！」
珊珊同安仔曾於TVB劇集《刑事偵緝檔案》合作，二人友情逾廿年。兩年前，珊珊被抑鬱所困，安仔陪伴她在貝沙灣散步，珊珊不會忘記這位好友在低潮時扶一把：「你有冇印象，我當其時行十零廿步就要搵張凳唞一唞，然後就請教安仔一啲有關基督教嘅嘢，安仔又答到我一啲迷思，唔係人人都答到。」安仔說：「我都係以自己嘅人生去理解呢個宗教，如果要去認識佢，我諗要去讀神學先可以。」
珊珊又感激安仔經常提點自己處事不要太片面：「廿幾年嚟，中段大家冇聯繫，但呢幾年見番，你好坦誠指出我呢樣嘢，提我唔應該咁樣睇嘢！」安仔自覺同珊珊有相似地方︰「我哋都會退後一步，同埋都會自己解決問題就算，唔會勞煩人！你話嗰陣時，我同你講呢番說話，其實某程度可能都係提緊我自己，我都喺度學習緊，咁我咪可以同你一齊探討，多啲角度去睇問題！」至於另一相似地方，就是二人都是對身邊事物敏感度高的人，會很快察覺對方是否別有用心：「啲人係真情定假義，好容易feel到，會feel佢係做緊戲，定係真。」
珊珊指安仔樂於提攜後輩：「我睇過你新劇(《金式森林》)一啲幕後花絮，見你同劇中對手都相處好好，好有溝通。」原來安仔特意抽時間，跟劇中子女相處，為正式拍攝做好熱身，圍讀後安仔主動請劇中三個兒子及女兒留低傾偈，各自分享自己私下嘅童年經歷，深入了解大家心理缺失同難忘經歷，五人仲約定當日談心內容唔會透露出去，當各自袋住大家嘅秘密後，五人小組先變得熟絡。安仔謂：「好多都係第一次合作，第一日我叫劇中仔女入房，一定要同佢哋傾偈，我唔想開工時候佢哋仲當我係郭晉安，我要佢哋當我係佢老竇！」
80年代入行嘅安仔見證咗演藝圈嘅變遷，從當年入行初期被力捧，有幸喺TVB台慶同兩位巨星張國榮、梅艷芳吊威吔登場，到依家網絡發達嘅年代，安仔亦與時並進，講到之前同歐陽震華、吳卓羲、王浩信、高鈞賢、林曉峰組「港劇男團」作客內地網上節目，唔擅長跳舞嘅佢仲被要求Chok樣唱跳，一度成為網絡熱話，珊珊直問安仔有冇尷尬？安仔就表示一啲都唔尷尬，覺得依家係網絡年度，爆紅並無章法，咩都值得試吓，好似之前因為佢哋跳得唔夠好，先至可以引爆話題，經已達成佢哋當初作客節目嘅目的。
節目中安仔亦鮮有地講起自己嘅兒子郭令山，大讚仔仔識諗15歲經已決定立志做音樂家，16歲自己去德國跟住樂團演出，仲出走英國讀皇家音樂學院。安仔都話不時都會掛住仔仔，但係佢相當放心仔仔獨自喺外國進修。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
