無綫繼續爆離巢潮，不斷有資深藝人離巢，繼昨日羅蘭消失於演藝員名單後，今日更連三屆視帝郭晉安都同樣消失不見，似乎已低調結束與無綫嘅多年合作關係。
然而，郭晉安曾被多次傳出離巢消息，最近一次係2021年，當時佢嘅資料同樣一度消失喺演藝員名單，隨着經理人解釋只係更新照片嘅誤會，郭晉安嘅相關資料亦重新「上架」。但無論郭晉安是否被除名，都令唔少原本睇好郭晉安可以憑《金式森林》力爭第四屆視帝嘅網友，擔心會增加變數。
事實上，郭晉安唔止演技精湛，連做生意都同樣了得，過去更曾公開表示未來將會減少演藝圈工作，投放更多時間喺生意發展。此外，郭晉安同時更係資深物業投資者，手持多個住宅及工商物業，身家以億元計。
對於是否離巢以及網民戥佢可惜，擔心睇唔到佢衝4屆視帝一事，郭晉安接受東網回應表示：「多謝大家關心，明白大家可惜嘅原因！做咗咁多年嘅藝人，我認為最開心最幸福嘅就係有得選擇，每條路都可以由自己去決定係最好不過！希望會喺更多嘅頻道同大家見面！」至於離巢後係咪主力打理生意，郭晉安透露：「又唔會主力去做一樣嘢嘅！有劇集搵我演出我都會去考慮演出。」而被問到之後有咩計劃打算時，郭晉安則神秘表示時機到自然會同大家分享，但問到離巢原因則僅表示：「原因唔講啦，大家估吓啦」。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
