藝人陳家樂人生旅途曾跌落低谷，眼睛在無預警下突然劇痛充血至視力模糊，醫生診斷後直指情況不容輕視，有機會失明。家樂隨後停工5個月，專注治療望盡快康復！由於要食足3個月藥，導致心跳、失眠，忐忑不安，幸得到太太連詩雅及工作團隊無限鼓勵，令他重燃希望！
英皇男神陳家樂於2023年中迎娶藝人連詩雅（Shiga），當時事業愛情兩得意，萬萬料不到厄運原來正來襲！如今算是戰勝病魔的他受訪時娓娓道來：「有日換好衫想揸車去放狗，突然間隻眼劇痛，真係好辛苦，仲要痛到嘔，本來唔鍾意睇醫生嘅我都要屈服去醫院，坐輪椅被推入急症室，本來醫生話冇事，開咗特效藥同眼藥水叫我返屋企觀察。」豈料兩小時後藥力散去，家樂情況比之前更嚴重，眼白全發紅，睜開即嚇怕太太，此時他心知不妙。
最終他找到一位權威眼科醫生，診症後始知絕非小事：「普通眼紅可能只係眼角膜爆咗微絲血管，但原來我係眼球後方連接腦神經線嘅部分出咗問題，所以搞到眼壓好高，但當時如果接受手術嘅話風險好大。醫生同團隊開咗好幾次會，決定先用方法打疫苗入去，睇吓能唔能夠止血先，當時我就開始諗，如果盲咗以後點算呢？我要照顧父母同啱啱結婚嘅太太喎，心情真係好差，亦唔敢同人傾訴！」
住院期間，家樂只能默默的等待，無助感充斥着整個人，當時工作繁忙的Shiga每天要跑醫院，無微不至照顧他，幸而約5天後家樂終有止血的迹象，兩公婆才暫時放下心頭大石，家樂說：「出院後要食足3個月藥，就算依家每年都要返去覆診一次，最離奇嘅係冇人知究竟發生乜事而染病。（當時放棄咗好多工作？）停咗工起碼5個月，仲要食藥後有副作用，經常失眠同心跳得好快。嗰陣有試過戴住墨鏡出嚟做嘢，逢人問我，我都話踢波整到，意圖淡化件事，完全唔想有人知。」
因禍得福贏得新角色
其實「出事」前，家樂得悉關錦鵬導演將監製英皇電影《像我這樣的愛情》，鑑於對劇本及角色很有興趣，他毛遂自薦希望獲得一次試鏡的機會：「點知得番嚟嘅答案係，佢哋想定咗女主角先，同埋覺得我嘅陽光形象同角色有反差，所以話要考慮，點知一等我就病咗喇！」然而命運總會安排「最合適的」出現，家樂休養期間突然接獲劇組邀約：「當時我狀態好差，但覺得點都要赴會，無論如何都要同人解釋吓。佢哋知我出事後安慰我，仲肯聽我講心事，最終認為嗰刻我嘅人設好適合角色需要，都算係一拍即合」
經歷了這次人生噩夢後，家樂得到前所未有的領悟，《像》片的拍攝，令他完全放低自己，與劇組齊齊創造了性義工「阿健」（角色名字）：「覺得有人陪我行呢條路，個心定咗，亦都同自己講以後演戲唔可以放過自己，要揸到好實，觀眾先睇到你！大家講得最多嘅大膽演出被安排喺中後期拍攝，我乜都冇諗豁咗出去，因為今次着重心靈赤裸遠勝於肉體。（現實生活中嘅陳家樂，可唔可以好似性義工咁，性、愛分開睇？）唔得，性愛係合一嘅，點都要有Feel先可以行下一步。」
鄧麗欣Gym房偷睇女
陳家樂除了拍戲，亦有主持網上節目《巴打圍爐》，日前節目訪問女星鄧麗欣（Stephy），家樂以「好掁眼」來介紹她「出場」，大家都以為在講Stephy「愛放閃」，但原來是在形容她的經典歌《電燈膽》，Stephy登場時都忍不住搞笑地說：「都唔好笑嘅，聽到都覺得有啲尷尬。」
Stephy在節目中分享有關做Gym的事，並指男友很喜歡做運動，至於做Gym時遇上大隻型男會否望多幾眼？她笑言：「我鍾意望女仔多啲！（鍾意望女仔邊個位置？）Pat Pat，因為女仔Pat Pat好難練得靚，尤其係亞洲女仔，所以練到靚嘅話，係好勁。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
