尼日利亞近年經常爆發內部糾紛。
非洲「超霸鷹」尼日利亞喺今屆世盃外甩轆，未能直接出線而要踢第2圈，爭逐跨洲份附加賽資格。周五(14)凌晨對加蓬嘅生死戰前，竟爆出球員罷操風波，據報尼日利亞足總拖欠薪酬津貼同獎金長達6年，因而引發兵變，主將伊禾比賽前亦拍片疑表達對入住簡陋酒店不滿，引嚟炮轟。
球星如雲嘅尼日利亞，意外失落非洲區9個直接出線席位， 搞到要踢第2圈嘅4強淘汰賽，贏到仲要踢跨洲份附加賽，第1擊係對住加蓬，但球員喺摩洛哥集合後拒絕操練，並由域陀奧森漢同盧卡文等做代表同足總談判，消息指足總拖欠球員嘅獎金同津貼多年，最耐嗰筆更加追溯到2019年。
據報王牌前鋒域陀奧森漢因拖糧一事，最初曾拒絕徵召，後來先回心轉意，而效力英超富咸嘅伊禾比，到達摩洛哥後更喺大軍入住嘅酒店拍片，擺出「不屑」表情影住房內同窗外嘅差勁環境，疑似對足總安排入住嘅酒店表示不滿，唔少球迷都炮轟球員「扮大牌」，未有專注為尼日利亞踢好生死戰。
尼日利亞隊長杜斯特伊岡，周四(13日)凌晨喺社交網宣布「罷操結束」，佢聲明表示：「事件已經解決，一大筆數已經找咗，球員團結一致為尼日利亞比賽，喺嚟緊賽事付出100%。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
