男團MIRROR人氣王姜濤出道7年來一舉一動備受關注，不時受到惡評與攻擊，承受着沉重壓力。身經百「箭」的他近期「緣」字行頭，研究佛經自行調節，更無懼重提入行以來最大黑暗史！他下月舉行的演唱會掀起撲飛潮，姜濤竟以「隨緣」作安撫，反令正為撲飛愁爆的「姜糖」怒吼：「我哋要飛呀！」偶像都冇面畀！
現年26歲的姜濤下月將於亞博舉行一連4場《KEUNG TO "LAVA" LIVE 2025》演唱會，繼前年後再度舉行個唱，並以蛻變、重生為核心概念，他早前接受訪問時，坦言重生並不是拋棄過去，而是要帶着過去的一切：「唔好避忌，咁先可以組成完整，好似水同火看似唔可以共融，但Lava（岩漿）同時擁有水同火嘅特性。」
姜濤入行以來面對不少批評及輿論壓力，提到7年間「最大鑊」的事，竟非「公審女網民」或今年6月的「西環墮海」事件，而是他於2022年腳傷做手術後首個復出的活動「叱咤頒獎禮」上，他突然跪地又衝落台高呼「I'm back」，遭網民炮轟「失控」，如今舊事重提，他直言：「的確係較黑暗嘅一段時間，嗰時梗係驚，因為係第一次面對。」他否認仍耿耿於懷，更以前輩身份鼓勵師弟說：「同《全民造星VI》嘅小朋友講，唔好驚！後嚟睇番件事，比起我之後嘅經歷就覺得好小事，所以冇當下過唔到嘅嘢；亦同屋企人講，依家嘅我冇佢哋想像中咁軟弱。」
公開爭取 多啲開騷
最近姜濤對佛學有興趣，早前在社交網分享出自《金剛經》的經文，連人也變得佛系，句句都講「隨緣」，對於「姜糖」與好友想撲飛看其個唱，他一句：「有緣咪過嚟睇吓囉！」想不到令不少為撲飛愁爆的「姜糖」忍不住留言：「我哋要飛呀！隨咩緣！」連偶像都冇面畀！姜濤個唱連日來的優先訂票均瞬間售罄，難怪粉絲「嬲豬」，惟有寄望後日的公開售票。
而問到騷肌及嘉賓問題，姜濤繼續「玄」氣十足說：「未到咁勁騷到肌肉住。（緣分幾時到呢？）都唔係好遠，可以好快。」被讚充滿自信，他即着傳媒代向公司爭取：「叫佢哋快啲幫我開多個演唱會，乜嘢都唔好搞，淨係開演唱會，因為完全表達到想法，係好純粹嘅地方。（想唔想挑戰啟德主場館？）隨緣，冇特別Set目標，呢行好多嘢唔係自己控制到。」
磅數保密 隨心操肌
雖然姜濤凡事「看透」，但對音樂則非常有堅持，更自爆被公司及監製指「大諗頭」，沒考慮Budget問題。深受圈中前輩愛錫的他，又大爆正聯絡能令大家「嘩嘩聲」的特別嘉賓，目前要保持神秘，只可透露：「4場唔同，前輩、後輩都有。（最鍾意邊位嘉賓？）某一場嗰個，其實個個都鍾意。（男定女？）男仔，特別鍾意。（成功請到未？）未落實，都係緣分到就得，有時緣分唔到就唔得㗎」
姜濤的身形不時成為談論話題，他笑言磅數有「自己的數字」，但不便公開；又稱有跟健身教練操肌，只是受訓過程很隨意：「頂得幾耐得幾耐，撐唔到時，可能10分鐘就完，撐到嘅話，幾個鐘都得。」現時他為「備戰」而跑步及打籃球：「我會一邊打波一邊唱歌練氣，大家會覺得我好嘈。（有膝蓋舊患仲打波？）有做物理治療，呢啲強身健體嘢唔嫌多。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
