般奴費南迪斯(右)受傷，曼聯有意簽入魯賓尼維斯(左)。
曼聯隊長般奴費南迪斯上場英超對阿士東維拉，不幸受傷，最新消息指佢需要休戰1個月，般費過往英超缺陣間期，球隊成績急插水，令會方大為擔憂，計劃下月轉會市場重開後增兵，填補般費位置，頭號目標正係另1位葡萄牙國腳魯賓尼維斯。呢位28歲中場拒絕同希拉爾續約，曼聯有望以平價2,000萬鎊(約2.1億港元)買到佢。
據悉般奴費南迪斯腿筋受傷，起碼缺陣1個月，意味將錯過曼聯未來7場賽事，包括英超對紐卡素、狼隊、列斯聯、般尼、英足盃第3圈對白禮頓，甚至無緣「曼市打吡」對曼城及下月底鬥阿仙奴。
根據英國《太陽報》統計，般奴費南迪斯成「魔」後踢212場英超，協助球隊獲得102勝51和59負，勝出達48.1%。佢缺陣9場英超，曼聯只有3勝1和5負，勝出率急跌至33.3%，當中般費缺陣近6場英超，紅魔鬼更只有1和5負，可見球隊失去呢位核心人物，表現大打折扣。
曼聯為減少般費倦勤嘅影響，急需簽入具級數中場，已睇中魯賓尼維斯，佢曾於2017至23年效力狼隊，有豐富英超經驗，加上同曼聯主帥魯賓艾摩廉都係葡萄牙人，大家非常熟悉對方，唔需要花時間磨合，絕對係「應急」最佳人選。
最關鍵係魯賓尼維斯將於明夏約滿，佢無意同沙特豪門希拉爾續約，想重返歐洲搵食，希拉爾惟有焗住出售佢，估計2,000萬鎊可以成交，紅魔鬼正好趁機接貨。
事實上，艾摩廉早前已表示，有可能冬季簽入新兵，盛傳人選包括魯賓尼維斯，當時希望用佢取代可能離隊嘅明奈，依家可以作為般費嘅替身。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
