電影版《尋秦記》成全城熱話，由劇集版原班人馬再續經典，除古天樂、林峯、宣萱等主演，當中古天樂為新片宣傳最為投入，近乎每分每秒都係谷緊票房，尋日（28日）就輪到去電台，接受DJ少爺占、當奴等訪問。一班DJ為見偶像，齊齊着上古裝「秦始皇」裝恭迎古天樂，點知男神一落車望到佢哋個樣，即刻笑指以為自己去錯精神病院，真係未出發先興奮！
當中少爺占大爆節目主持中有4個都係《尋秦記》Fans，當奴今晚（29日）已準備入場睇第5次，另一成員更係播主題曲時已經感動到喊。提到片中加入苗橋偉（三哥）及蔡一智，古天樂即爆笑指睇中蔡一智係因為佢啲頭髮：「佢個樣其實幾古裝，啲頭髮已經自己搞掂，唔使Gel頭，好真嘅呢件事。」又指蔡一智片中角色夠「私縮」又忠心，大讚蔡一智有Feel。
被問到如何可以引到古天樂去現場謝票，佢就自爆第一點係要同古媽媽講：「嗰日我阿媽生日，佢同我講『我有10個朋友包場，你可唔可以10場都同我去謝晒票？』我話吓……」引得全場爆笑。古天樂講到自己仍鍾愛Marvel系列，又指自己從來冇諗過要去荷里活發展：「我冇諗過呢樣嘢，點解唔喺呢度打一片天出嚟？點解係要去到嗰邊…係咪吃香啲呢？但係Marvel又係另外嘅嘢！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
