卡斯米路對曼聯感情深厚。
效力曼聯第4個球季嘅巴西中場卡斯米路，周五(23日)宣布將會喺季尾「脫魔」，並喺個人社交網發表感人告別信，表明自己係「一世紅魔」。周薪35萬鎊嘅卡斯米路離隊後，曼聯將加速年輕化，今個夏天將重金簽入新「6號」，目前正考核3大候選人。
曼聯周一(26日)凌晨大戰阿仙奴前，卡斯米路喺社交網突然宣布：「知道舞台幾時完結、知道幾時要講再見，就喺你永遠被記住同尊重嘅時候。未來4個月，我會為呢個徽章同目標拼盡，對曼聯同曼迷嘅愛係永恆，一世紅魔！」曼聯官網亦證實呢位「連環勝利者」將喺夏天約滿離隊。
下個月就34歲嘅卡斯米路，喺2022年由皇家馬德里加盟，35萬鎊周薪係曼聯最高薪球員之一，一度被新老闆拉特克利夫點名係曼聯「買錯人」範例。不過呢位曾5奪歐聯冠軍嘅世界級中場，加盟曼聯後幫球隊捧過英足盃同英聯盃冠軍，今季亦係曼聯中場絕對核心，聯賽已上陣20場攻入4球。
據英國《太陽報》報道，曼聯本來有權啟動續約1年條款，但商討後決定「分手」，騰出薪酬空間去年輕化，並且引入新「6號」列為夏天首要任務，目前3大候選人分別係水晶宮嘅禾頓、諾定咸森林嘅艾利洛安達臣同白禮頓嘅卡路士巴利巴，至於青訓新星明奈亦會擔起大旗。
至於卡斯米路嘅去向，佢今個月開始可以自由同英超以外球會簽約，據報巴甲、沙職同美職球會都對佢有興趣，其中美職嘅洛杉磯銀河已蠢蠢欲動，有機會率先出手搶人。
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
