賓斯拜尼係多蒙特出局最大罪人。
周四(26日)凌晨歐聯附加賽次回合，意甲球隊阿特蘭大上演驚天逆轉，首回合落後0比2劣勢下，返主場大勝4比1，兩回合合計贏4比3晉級16強。今場逆轉嘅主角，係多蒙特「黑仔王」賓斯拜尼，呢位中堅1人「送」4個入波畀對手兼食紅牌，黑仔程度達「地獄」級別！
阿特蘭大要收復2球落後失地，今場一開波就瘋狂搶攻，5分鐘一次左路傳中，賓斯拜尼飛鏟解圍，點知鏟咗畀施卡馬卡射空門；上半場尾聲，沙柏哥斯達禁區外遠射，角度唔太刁鑽，龍門亦做好撲救準備，但賓斯拜尼出腳阻擋反而將個波折射入網。
下半場賓斯拜尼噩夢未完，佢喺57分鐘一次頭槌漏頂，被身後嘅柏沙歷近門頂入。多蒙特75分鐘由卡廉艾迪耶美破蛋，總比數3比3以為要踢加時，但喺補時階段，賓斯拜尼「虎尾腳」解圍踢中對手頭部，被罰12碼兼且2黃1紅被逐，拿沙沙馬迪錫操刀射入，為阿特蘭大絕殺晉級。
多蒙特教練尼高高華賽後表示：「我唔會指摘任何一個球員，雖然最後嘅入球唔應該發生......我哋犯錯太多，喺歐聯犯錯就會被懲罰，所以我哋好失望，而且踢唔出水準更加令人沮喪。」阿特蘭大晉級後，成為16強唯一意甲代表。
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
